Tags-Dard

thī yuuñ to shām-e-hijr magar pichhlī raat ko
vo dard uThā 'firāq' ki maiñ muskurā diyā

kis qadar dard ke shab kartā thā mazkūr tirā
vo hī bīmār tirā ḳhasta-o-ranjūr tirā

ishq kā bhī qabīl hotā hai
dard dil kā kafīl hotā hai

tire sogvāroñ kī zindagī kabhī mutma.in na guzar sakī
jo bujhī kabhī koī tishnagī ka.ī aur dard machal ga.e

nazar bachā ke tire ishva-hā-e-pinhāñ ne
diloñ meñ dard-e-mohabbat uThā.e haiñ kyā kyā

sab apnī zaat meñ gum haiñ ye soch kar 'nāyāb'
parā.e dard ko kyuuñ dard-e-sar banāyā jaa.e

shabāb-e-dard mirī zindagī kī sub.h sahī
piyūñ sharāb yahāñ tak ki shaam ho jaa.e

har koī apne ġham meñ hai masrūf
kis ko dard-āshnā kahe koī

aa ga.ī kyā jāniye phir kis masīhā-dam kī yaad
dard-e-paiham ruk gayā ashk-e-musalsal tham ga.e

ek vo jin ke tasarruf meñ haiñ sab mai-ḳhāne
ek ham jin ke liye durd-e-tah-e-jām nahīñ

chhoḌ kar dil ko dard jaa.e kahāñ
ye makīñ hai isī makān se ḳhush

ḳhushbū-e-dard ke baġhair rañg-e-jamāl ke baġhair
kaise guzar ga.ī hayāt hijr-o-visāl ke baġhair

dard kā dil kā shaam kā bazm kā mai kā jaam kā
rañg badal badal gayā ek nazar ke saath saath

jhuñjhlā ke kyuuñ na chhīn luuñ TuuTā hai vo azaab
phir vaqt ghūmtā hai liye dard kī zakāt

kisī meñ tāb-e-alam nahīñ hai kisī meñ soz-e-vafā nahīñ hai
sunā.eñ kis ko hikāyat-e-ġham ki koī dard-āshnā nahīñ hai

abas hī mahv-e-shab-o-roz vo duā meñ thā
ilaaj us kā agar dard-e-lā-davā meñ thā

dīda-e-tar kī kahānī ab mukammal ho ga.ī
dard sab ashkoñ meñ ghul kar ek jaise ho ga.e

zindagī kā dard le kar inqalāb aayā to kyā
ek doshīza pe ġhurbat meñ shabāb aayā to kyā

ḳhuub hai dard-o-ġham-e-dil kā mudāvā lekin
ḳhud ko bhī ai dil-e-nākām nazar meñ rakhnā

kyā kyā haiñ dard-e-ishq kī fitna-tarāziyāñ
ham iltifāt-e-ḳhās se bhī bad-gumāñ rahe