Tags-Dard

ab jo rusvā.ī pe merī unheñ dard aayā hai
bāryābī ke kuchh āsār nazar aate haiñ

nahīñ dekhā kahīñ jo mājrā-e-ishq meñ dekhā
ki ahl-e-dard chup haiñ chāra-gar fariyād karte haiñ

tamāshā.ī huuñ yuuñ apne ġhamoñ kā
ki jaise dard-o-ġham dekhā nahīñ hai

nadīm-e-dard-e-mohabbat baḌā sahārā hai
jabhī to ye ġham-e-daurāñ hameñ gavārā hai

apnī hī zindagī thī kuchh aisī ḳhizāñ-nasīb
tum bhī hamāre dard kā darmāñ na kar sake

dard-e-hastī kī davā kar leñ ḳhulūs-e-dil se
aao ik farz adā kar leñ ḳhulūs-e-dil se

lazzat-e-dard milī ishrat-e-ehsās milī
kaun kahtā hai ham us bazm se nākām aa.e

kuchh to surāġh mil sake mausam-e-dard-e-hijr kā
sañg-e-jamāl-e-yār par naqsh koī banā.iye

nāz-parvar vo tabassum se kahīñ
silsile dard ke milte hoñge

us galī se chalī dard kī rau magar shahr meñ ahl-e-dil haiñ na ahl-e-nazar
jaane kis sar se guzregī ye mauj-e-ḳhūñ jaane kis ghar ye sailāb-e-ġham jā.egā

kī qazā-e-mubram ne zindagī kī ġham-ḳhvārī
dard kī davā pahuñchī dard be-davā ho kar

baḌhtā hai na ghaTtā hai marte haiñ na jiite haiñ
dard par ḳhudā kī maar dil meñ rah gayā ho kar

dil hameñ huā hāsil dard meñ fanā ho kar
ishq kā huā āġhāz ġham kī intihā ho kar

ahl-e-hunar ke dil meñ dhaḌakte haiñ sab ke dil
saare jahāñ kā dard hamāre jigar meñ hai

shādāb shāḳh-e-dard kī har por kyuuñ nahīñ
har barg ik zabāñ hai to phir shor kyuuñ nahīñ

ghire haiñ dard-o-alam meñ firāq ke aise
ki sub.h-e-īd bhī yaañ shaam hai mahram kī

ik ajnabī kī baat meñ jaadū kā thā asar
patthar diloñ meñ dard-e-mohabbat jagā diyā

vaqt bhī ab mirā marham nahīñ hone paatā
dard kaisā hai jo maddham nahīñ hone paatā

ik iiñT sāmne dīvār se nikāleñ ab
chalo ki phir se nayā koī dard-e-sar kholeñ

ye zindagī kī hai rūdād-e-muḳhtasar 'fānī'
vajūd-e-dard musallam ilaaj nā-mālūm