Tags-Dhoka

na chheḌiye naġhma-e-mohabbat ki ye hai daur-e-fareb-kārī
diloñ kī ḳhush-rañg vādiyoñ meñ kudūratoñ kā ġhubār hogā

junūñ kī baat chhoḌo is ga.e ghar kā Thikānā kyā
fareb-e-aql o hikmat ke parastāroñ ne kyā paayā

āhaToñ ke fareb meñ mat aa
un kā kyā e'tibār sone de

nazar fareb-e-qazā khā ga.ī to kyā hogā
hayāt maut se Takrā ga.ī to kyā hogā

phir koī jāñ-navāz bahāna tarāsh lo
phir koī dil-fareb achhūtī ḳhatā karo

zindagānī ik fareb-e-dā.imī hai sar-ba-sar
mujh pe ye zāhir huā shām-o-sahar ko dekh kar

parinda aa.ine se kyā laḌegā
fareb-e-zāt meñ aa kar maregā

fareb-andar-fareb ātish-dar-ātish ai ma.āz-allāh
ḳhudā nā-karda fasl-e-gul tirā anjām kyā hogā

kisī tarah din to kaT rahe haiñ fareb-e-ummīd khā rahā huuñ
hazār-hā naqsh aarzū ke banā rahā huuñ miTā rahā huuñ

jahāñ fareb ho 'majzūb' ye tirī sūrat
butoñ ke ishq kā tujh par gumāñ nahīñ hotā

vo fareb-ḳhurda shāhīñ ki palā ho kargasoñ meñ
use kyā ḳhabar ki kyā hai rah-o-rasm-e-shāhbāzī

aa jaao tum bahār kī takmīl ke liye
mausam hai dil-fareb fazā sāzgār hai

safar nasīb hī Thahrā jo dasht-e-ġhurbat kā
to phir gumāñ meñ fareb-e-sahāb kyā rakhnā

mujhe yaqīñ tire jalve fareb de deñge
mirī nigāh kā jab bhī gumān TūTegā

jān-levā hai fareb-e-rah-e-gulzār-talab
nashtar-e-shauq qarīb-e-rag-e-jāñ dekhte haiñ

mujhe ḳhabar hai sarisht-e-sifāl meñ hai zavāl
maiñ apne dil ko fareb-e-davām kyā detā

phir bhī kab samjhā fareb-e-husn ko
dil ko lākhoñ baar samjhānā paḌā

hai ġhanīmat ye fareb-e-shab-e-va.ada ai dil
kyā koī degā tujhe is se ziyāda ai dil

tabqe zamīñ ke hoñ ki hoñ aurāq-e-āsmāñ
qudrat ke dil-fareb risāloñ ko dekhiye

is tarah vo fareb se dil le ga.e mirā
jis tarah aadmī se daġhā aadmī kare