Tags-Dhoka

fareb-e-ārzū kī sahl-añgārī nahīñ jaatī
ham apne dil kī dhaḌkan ko tirī āvāz-e-pā samjhe

na jaane aa gayā dām-e-fareb meñ kaise
thā sabz baaġh jo mujh ko dikhā gayā ik shaḳhs

ye dostī ye mohabbat ye inkisār fareb
ye ham-navā ye muāvin ye mere yaar fareb

mirī hayāt mire roz-o-shab mirī duniyā
ye iḳhtiyār numā.ish ye e'tibār fareb

ḳhalish jigar meñ hai aur tajziya hai āñkhoñ kā
baḌe salīqe se dete haiñ ġham-gusār fareb

ajiib rañg-e-vafā hai ajiib tarz-e-sitam
na dil-pazīr mohabbat na shāndār fareb

naqāb itne haiñ chehroñ pe kyā haTāoge
har ek baar haTāo har ek baar fareb

qadam qadam pe ta.alluq qadam qadam rishte
ye baar baar dilāse ye baar baar fareb

qadam qadam pe diyā hai fareb rahbar ne
jo rahbarī use kahiye to rahzanī kyā hai

namāz-e-ishq jo shāmil nahīñ ibādat meñ
fareb-e-kufr sarāsar hai bandagī kyā hai

maiñ nazr kar duuñ use ye lahūluhān badan
fareb-ḳhurda aqīdat kā qāfila mil jaa.e

lipaT ga.e haiñ paañv se lahū meñ jazb ho ga.e
maiñ naqsh-pā-e-umr huuñ fareb-ḳhurda-e-ḳhushī

chamak damak par miTā huā hai ye bāġhbāñ tujhko kyā huā hai
fareb-e-shabnam meñ mubtalā hai chaman kī ab tak ḳhabar nahīñ hai

zāhir fareb-e-va.ada phir e'tibār itnā
vo likh gayā diloñ par jo kah diyā zabāñ se

āñkhoñ meñ e'tibār kā mausam basā rahā
mujh ko fareb de ke vo sūrat guzar ga.ī

vīrāniyoñ ko apnā muqaddar samajh liyā
saare fareb sah ke vo chup meñ utar ga.e

ye kaisī vaqt ne badlī hai karvaT
fareb-e-zindagī hai aur maiñ huuñ

shām-e-visāl se ho kyā mahv-e-fareb-e-ārzū
yaad nahīñ rahī hameñ sub.h-e-vidā-e-yār kyā

fareb khaa.e haiñ rañg-o-bū ke sarāb ko pūjtā rahā huuñ
magar natā.ej kī raushnī meñ ḳhud apnī manzil pe aa rahā huuñ

ahl-e-duniyā ne diye haiñ is qadar mujh ko fareb
kartā hai vahshat-zada ab apnā hī saayā mujhe