Tags-Dhoka

barsoñ fareb khāte rahe dūsroñ se ham
apnī samajh meñ aa.e baḌī mushkiloñ se ham

maiñ shāḳh-e-sabz nahīñ mahram-e-sabā bhī nahīñ
mire fareb meñ kyuuñ aa gayā hai taa.ir tū

husn-e-sūrat kā na khā aslan fareb
kilk-e-san.at-gar kī san.at hī sahī

zahe karishma ki yuuñ de rakkhā hai ham ko fareb
ki bin kahe hī unheñ sab ḳhabar hai kyā kahiye

tum aur vafā karo ye na mānūñgā maiñ kabhī
us ko fareb do jo tumheñ jāntā na ho

nādān dil-fareb mohabbat na khā kabhī
duniyā meñ kis ne kī hai kisī se vafā kabhī

kaho kuchh haqīqat-e-mushtahar ki mujhe kahīñ kī ḳhabar nahīñ
ye manāzir-e-do-jahāñ haiñ kyā jo fareb-e-zauq-e-nazar nahīñ

ye fareb-e-jalva hai sar-ba-sar mujhe Dar ye hai dil-e-be-ḳhabar
kahīñ jam na jaa.e tirī nazar inhīñ chand naqsh o nigār par

mirī nazar kā to kyā zikr ḳhud bahār ke phuul
fareb-ḳhurda-e-rañgīnī-e-bahār rahe

vo aur kaun tire qurb ko tarastā thā
fareb-ḳhurda hī terā fareb khāte the

tire qarīb pahuñchne ke Dhañg aate the
ye ḳhud-fareb magar raah bhuul jaate the

is gulistāñ meñ manāzir kā vahī hai rañg bhī
dekhne vaalā fareb-e-dīd meñ mad.hosh hai

kaun bhūlā hai 'na.īm' un kī mohabbat kā fareb
phir bhī in taaza ināyāt se jī Dartā hai

fareb khātī hai pyaas apnī
qadam qadam hai sarāb sā kuchh

ye zindagī fareb-e-musalsal na ho kahīñ
shāyad asīr-e-dām-e-balā ho gayā huuñ maiñ

kise ḳhabar hai ki kab chaltī saañs ruk jaa.e
ye zindagī bhī fareb-e-qazā lage hai mujhe

fareb khaa.e haiñ 'hairat' tarah tarah ke magar
fareb-e-ishq bhī khaao to koī baat bane

'ashraf' fareb-e-zīst hai kab imtihāñ se kam
is ke sivā to aur yahāñ imtihāñ na the

ab haiñ fareb kis liye hogā yaqīñ kisī ko ab
tum se vafā kī aarzū ye bhī ḳhayāl-e-ḳhām hai

DhūñDhtā phirtā hai mujh ko kyuuñ fareb-e-rañg-o-bū
maiñ vahāñ huuñ ḳhud jahāñ apnā pata miltā nahīñ