Tags-Dil

itnī bhī rasā.ī ho 'joshish' to ġhanīmat hai
ḳhāk-e-kaf-e-pā maliye dil-dār kī āñkhoñ se

na dil meñ koī ġham rahe na merī aañkh nam rahe
har ek dard ko miTā sharāb lā sharāb de

apne dil ko donoñ aalam se uThā saktā huuñ maiñ
kyā samajhtī ho ki tum ko bhī bhulā saktā huuñ maiñ

bāteñ mohabbatoñ kī mire sāmne na kar
tū jāntā bhī hai ki maiñ dil kā marīz huuñ

phir merā Thiik hone ko dil hī nahīñ kiyā
us ne mujhe kahā thā maiñ achchhā marīz huuñ

koī kyuuñ kisī kā lubhā.e dil koī kyā kisī se lagā.e dil
vo jo bechte the davā-e-dil vo dukān apnī baḌhā ga.e

maiñ apnī aql se kuchh aur kaam le lūñgā
kabhī ye dil bhī mirā imtihāñ meñ aa jaa.e

nahīñ jag biich aur ai dilbar
vasl bin tere sūd-mand mujhe

mire pahlū meñ dil kab thā lahū kī buuñd thī 'muztar'
so ab vo buuñd bhī qismat se paanī hotī jaatī hai

dil kī bisāt kyā thī nigāh-e-jamāl meñ
ik ā.īna thā TuuT gayā dekh-bhāl meñ

guftugū-e-dil ba-unvān-e-mohabbat
sar-ba-sar ilzām ho kar rah ga.ī hai

dil mire dil ġham-e-duniyā se nipaT le ki abhī
tujhe karnī hai na.e zaḳhm kī mehmānī bhī

dil kahāñ hotā hai har ek ujaḌne vaalā
vo bigaḌtā hai faqat jo ho bigaḌne vaalā

dete na dil jo tum ko to kyuuñ bantī jaan par
kuchh aap kī ḳhatā na thī apnā qusūr thā

dharī hī rah ga.ī ḳhvāhish nihāl hone kī
numū kā daur thā aur dil dukhā huā niklā

fazā-e-jāñ meñ to ik iztirār thā hī magar
jahān-e-dil meñ bhī dhaḌkā lagā huā niklā

tujh zulf meñ dil ne gum kiyā raah
is prem galī kuuñ intihā na.iiñ

kuchh kamī shāyad tirī miTTī meñ hai
jab sameTā dil tujhe bikhrā hai tū

aage aatī thī hāl-e-dil pe hañsī
ab kisī baat par nahīñ aatī

jaane lagā hai dil kī taraf un kā haath ab
naale shab-e-firāq ke kuchh kaam kar ga.e