Tags-Dil

talvoñ se rāsta chaman-e-dil-kushā banā
jalvoñ se aa.ina dar-o-dīvār ho ga.e

dil jāñ-ba-lab jigar meñ tapak jaan be-qarār
ham terā naam le ke gunahgār ho ga.e

aa.ī 'havas' mujhe phūloñ kī bū kabhī baiThā na jā ke maiñ bar-lab-e-jū
mirī tañgi-e-dil to ga.ī na kabhū mujhe bāġh-e-jahāñ ke fazā kī qasam

mujh se kahtā hai mirā dūd-e-jigar sūrat-e-sham.a
dil meñ rokoge to maiñ sar se nikal jā.ūñgā

kahāñ ga.iiñ rañgīn patañgeñ laTTū kāñch ke bañTe
ab to khel bhī bachchoñ ke haiñ dil dahlāne vaale

kahā thā ai dil-e-nā-faham-o-nādāñ tujh se ye kis ne
ḳhudā-ḳhāne kī hurmat ko sanam-ḳhāne meñ rakh denā

pasand aa.e na aa.e munhasir hai ye tabī.at par
kisī ke sāmne dil ham ko nazrāne meñ rakh denā

us shaḳhs kī ulfat meñ giraftār ye dil thā
jis shaḳhs ko chhūne kī ijāzat bhī nahīñ thī

kaun sunegā ye tūlānī qissa kis ko fursat hai
jo kuchh mujh par biit rahī hai apne dil meñ rakkhūñ maiñ

ik aahaT sī hotī rahtī hai dil meñ
is sahrā meñ kaun bhaTaktā rahtā hai

phuul sī koī yaad hai us se vābasta
mere dil kā zaḳhm mahaktā rahtā hai

dil jaise mele meñ khoyā ik bachcha
har aahaT kī or lapaktā rahtā hai

dil meñ itnī aag nahīñ jo jal uTThe
bas yūñhī chup-chāp sulagtā rahtā hai

dair o haram bhī Dhah ga.e jab dil nahīñ rahā
sab dekhte hī dekhte vīrāna ho gayā

koī davā na de sake mashvara-e-duā diyā
chāragaroñ ne aur bhī dard dil kā baḌhā diyā

ishq kī mamlikat meñ hai shorish-e-aql-e-nā-murād
ubhrā kahīñ jo ye fasād dil ne vahīñ dabā diyā

tez hai aaj dard-e-dil saaqī
talḳhi-e-mai ko tez-tar kar de

kamāñ se chāhe na nikle kisī kā tīr-e-nazar
magar ye lagtā hai dil meñ utarnā chāhtā hai

apnā dil pesh karūñ apnī vafā pesh karūñ
kuchh samajh meñ nahīñ aatā tujhe kyā pesh karūñ

jo tire dil ko lubhā.e vo adā mujh meñ nahīñ
kyuuñ na tujh ko koī terī hī adā pesh karūñ