Tags-Duniya

ab ke ta.abīr mas.ala na rahe
ye jo duniyā hai is ko ḳhvāb karo

duniyā-dārī us ke bas kī baat nahīñ
vo kone meñ likhtā paḌhtā rahtā hai

kyā ḳhabar thī ki 'zafar' ruuh mirī duniyā meñ
ārzūoñ se kuchal kar kabhī mar jā.egī

tamām hech hai duniyā alā.eq-e-duniyā
jo naqsh zeb-e-jabīñ hai kisī ko kyā ma.alūm

baḳht kyā jaage mire duniyā shanāsā ho ga.ī
sab kī mujh se ho ga.ī hai rishtedārī āj-kal

gaañv kī aañkh se bastī kī nazar se dekhā
ek hī rañg hai duniyā ko jidhar se dekhā

bahut girāñ hai ye aish-e-tanhā kahīñ subuk-tar kahīñ gavārā
vo dard-e-pinhāñ ki saarī duniyā rafīq thī jis ke vāste se

hameñ ḳhabar hai zan-e-fāhisha hai ye duniyā
so ham bhī saath ise be-nikāh rakhte haiñ

ham ne bhī dekhī hai duniyā 'mohsin'
hai kidhar kis kī nazar jānte haiñ

ek maiñ huuñ ki is āshob-e-navā meñ chup huuñ
varna duniyā mire zaḳhmoñ kī zabāñ boltī hai

kab tak nibāheñ aise ġhalat aadmī se ham
duniyā hai 'maz.harī' se ḳhafā 'maz.harī' se ham

vo duniyā-dār haiñ ham ne kabhī kahā to na thā
ajiib log haiñ is sādgī ko bhuul ga.e

kab tak ye sail-e-ashk-e-ġham kab tak ye tūfāñ-ḳheziyāñ
duniyā fanā ho jā.egī ai 'nūh' bas ai 'nūh' bas

chaḌhte sūraj ke parastār haiñ duniyā vaale
Dūbte chāñd ko bin dekhe guzar jaate haiñ

kisī kī yaad meñ duniyā ko haiñ bhulā.e hue
zamāna guzrā hai apnā ḳhayāl aa.e hue

kyā kaheñ us ko ba-juz sar-gashta-e-fahm-o-ḳhirad
jis ko dīvāna kahā duniyā ne daanā ho gayā

ḳhālī bhī to kar ḳhāna-e-dil duniyā se
is ghar meñ mirī jaan ḳhudā aa.egā

yahāñ har-dam na.e jalve yahāñ har-dam na.e manzar
ye duniyā hai na.ī is ko purānī kaun kahtā hai

chashm-e-hasīñ meñ hai na ruḳh-e-fitna-gar meñ hai
duniyā kā har fareb fareb-e-nazar meñ hai

qismat se mil ga.ī hai ye bedārī-e-hayāt
is ishq ke nisār ki duniyā nazar meñ hai