Tags-Duniya

jism apne faanī haiñ jaan apnī faanī hai faanī hai ye duniyā bhī
phir bhī faanī duniyā meñ jāvedāñ to maiñ bhī huuñ jāvedāñ to tum bhī ho

kaash ham nākām bhī kaam aa.eñ tere ishq meñ
mutlaqan nākāra haiñ duniyā-o-dīñ ke kaam se

ik markaz-e-ḳhayāl hai duniyā kaheñ jise
koī nazar to aa.e ki tum sā kaheñ jise

zulf-e-darāz ban ke ulajhtī rahī mudām
ik tār-e-ankabūt hai duniyā kahīñ jise

hameñ bhī kyā zarūrī thā ta.alluq duniyā-dāroñ se
agar ham aap apne halqa-e-ahbāb meñ hote

bulandiyoñ se mirī samt dekhne vaale
mire qarīb to aa maiñ bhī ek duniyā huuñ

jis chāñd ke dīdār kī hasrat meñ hai duniyā
vo shaam Dhale ghar mire utrā hai ka.ī baar

phir se ḳhudā bānegā koī nayā jahāñ
duniyā ko yuuñ miTā.egī ikkīsvīñ sadī

mastān-e-mohabbat ne duniyā meñ yahī dekhā
TuuTe hue paimāne TuuTe hue mai-ḳhāne

har ik zabān darīcha hai ḳhāna-e-jāñ kā
so mujh ko pyaar hai duniyā kī sab zabānoñ se

hazār chehre haiñ maujūd aadmī ġhā.eb
ye kis ḳharābe meñ duniyā ne lā ke chhoḌ diyā

duniyā ne jo zaḳhm diye the bhar diye terī yādoñ ne
yādoñ ne jo zaḳhm lagā.e vo baḌh kar nāsūr hue

bad-duā ab mire hoñToñ pe machaltī hī nahīñ
isī duniyā meñ mirī chhoTī sī duniyā bhī to hai

ye lahn ho phir hind kī duniyā meñ ho afshāñ
bhārat ke musalmāñ

'bastāmī'-o-'basarī'-o-'muarrā'-o-'ġhazālī'
jis ilm kī jis faqr kī duniyā ke the vaalī

kahne ko lafz do haiñ ummīd aur hasrat
in meñ nihāñ magar ik duniyā kī dāstāñ hai

jannat ḳhayāl meñ hai na duniyā nigāh meñ
kyā lazzateñ milī haiñ ġham-e-be-panāh meñ

chalo duniyā se milnā chhoḌ deñge
magar ham aa.ine se kyā kaheñge

ḳhāke sabhī adhūre haiñ sab naqsh nā-tamām
duniyā meñ jo bhī kuchh hai mukammal lahū se hai

terī duniyā kī kaj-adā.ī se
laḌ rahā huuñ bharī ḳhudā.ī se