Tags-Duniya

dil bhī bas ek namūna hai ki duniyā pe miTā
nazr zebā thī kise aur guzārī kise hai

izzat bhī ek chiiz hai duniyā meñ ai 'falak'
us ghar na jā jahāñ ki tirī aabrū na ho

har taraf shor usī naam kā hai duniyā meñ
koī us ko jo pukāre to pukāre kaise

saarī duniyā ke haiñ vo mere sivā
maiñ ne duniyā chhoḌ dī jin ke liye

mujh ko dam lene kī bhī fursat na duniyā meñ milī
roz-e-maulid shādiyāna kuuch kā naqqārā thā

tārīk dikhā.ī detī hai duniyā ye mah-o-ḳhurshīd use
rozī kā sahārā ho jis din vo roz hai roz-e-eid use

muflis kī javānī eid ke din jab sub.h se aaheñ bhartī hai
duniyā ye amīroñ kī duniyā tab eid kī ḳhushiyāñ kartī hai

nahiñ duniyā ko dildārī kī aadat
sunā.e kis ko apnī dāstāñ dil

ġham-e-ulfat ġham-e-duniyā ġham-e-dīñ
uThā.e baar kyā kyā nā-tavāñ dil

ham ne jis duniyā ko Thukrāyā thā un ke vāste
mil ga.e vo to usī duniyā kā chakkar chāhiye

ḳhatīb-e-vaqt ne sikhlā diyā ye ahl-e-duniyā ko
ḳhitābat aur rakhnī hai adāvat aur rakhnī hai

talab meñ kaun duniyā kī ho pāmāl
ye baitulmāl kuchh bhī maal hai myaañ

salāmat-ravī jurm samjhegī duniyā
kisī se agar zikr-e-tūfāñ kareñge

jāgtā huuñ maiñ ek akelā duniyā sotī hai
kitnī vahshat hijr kī lambī raat meñ hotī hai

chiir kar parda-e-zulmat ko nidā-e-ġhaibī
raushnī bāñTne duniyā ko hamesha niklī

duniyā hai kitnī be-Thikāna
āshiq kī barāt ho ga.ī hai

tanhā.iyoñ kā dard sameTe hue koī
'farhat' chalā hai Thokareñ duniyā ko maar ke

kaun aisā hai jo duniyā kī zabāñ ko roke
maiñ ne maanā ki mire lab pe tirā naam na ho

kār-e-duniyā meñ lage rahte haiñ ham ai 'shārib'
shā.irī us ke liye hai jise kuchh kaam na ho

ham bhī ab se ba-qaul-e-'hālī' duniyā ko jhuTlāeñge
aaj talak is duniyā ne ham sachchoñ ko jhuThlāyā hai