Tags-Falak

falak se chāñd sitāroñ se jaam lenā hai
mujhe sahar se na.ī ek shaam lenā hai

shams o nujūm be-karāñ haft-falak nabard-gāh
raushniyoñ kī dauḌ meñ pā-e-farār kis ko thā

jin pe nāzāñ the ye zamīn o falak
ab kahāñ haiñ vo sūrateñ baaqī

ġhazal hai naam falak par qayām hai us kā
kabhī falak se zamīñ par utaar laa.eñ use

yak-ba-yak tū ne ye kaisā rañg badlā ai falak
terī gardish se kahīñ kyā saḳht jī halkāñ huā

falak tamām hai āġhosh-e-bāb-e-mahrūmī
shajar shajar yahāñ dast-e-duā hai mere liye

maiñ un sab meñ ik imtiyāzī nishāñ huuñ falak par numāyāñ haiñ jitne sitāre
'qamar' bazm-e-anjum kī mujh ko mayassar sadārat nahīñ hai to phir aur kyā hai

'farāsat' ab huī mahfil tamām ghar ko chalo
sarak rahī hai falak par ridā-e-āḳhir-e-shab

kidhar chalī hai nigār-e-falak kise ma.alūm
ye tasht-e-māh-o-sitāra uThā.e āḳhir-e-shab

paḌe aa kar falak ke āsiyā meñ
misāl-e-dāna haa.e dal ga.e ham

ye sab sahī ki zalzala hai tā-falak magar
shoḳhī to apnī dekh mirā iztirāb kyā

uThā de ham se jo baiThe ho.uuñ ko ab kī falak
to aarzū hai ye jī meñ ki be-qayās phireñ

kahnā ye tum se hai ki falak darmiyāñ na ho
rasm-e-sitam durust hai tarz-e-sitam ġhalat

mire dil ke nuur se baḌh ke nahīñ mirī jaañ ke surūr se baḌh ke nahīñ
jo maah o mehr falak par haiñ jo laal o guhar pātāl meñ haiñ

chāñd sūraj kī rakh ainak kuuñ sadā pīr-e-falak
ḳham ho kartā hai nazar taaki dekhe terī kamar

ho ga.e ḳhatm mujh pe jaur-e-falak
ab koī morid-e-balā na rahā

garche mirī chamak se band chashm-e-sitāra-o-falak
nuur huuñ phir bhī nuur kā rañg nahīñ milā mujhe

falak vo tafraqa-parvāz-e-ālam hai dilā sar par
ġhanīmat jāntā huuñ gor tak apnī rasā.ī ko

kaun hai zer-e-falak phirtā hai jo apnī ḳhushī
phir rahe haiñ sab jahāñ meñ āb-o-dāne ke liye

ḳhaak hone se banā chashm-e-falak kā surma
ḳhāksārī jo nahīñ ḳhaak bhī insāñ meñ nahīñ