Tags-Falak

na falak hogā na ye kūcha-e-qātil hogā
mire kahne meñ kisī din jo mirā dil hogā

khultā nahīñ ki kis ke liye sargirāñ huuñ maiñ
qadmoñ meñ ḳhaak sar pe falak kī ridā liye

tum ho falak kab samjhoge
dhartī kyā kuchh sahtī hai

chashm-e-faiz aur dast vo pāras-sifat jab chhū ga.e
mujh ko miTTī se uThāyā aur falak par kar diyā

jamā huā hai falak pe kitnā ġhubār merā
jo mujh pe hotā nahīñ hai raaz āshkār merā

ik shar-e-musalmānī ik jazb-e-musalmānī
hai jazb-e-musalmānī sirr-e-falak-ul-aflāk

zamīn-o-arsh-o-falak pā.emāl hote haiñ
na jaao sahn se bālā-e-bām uTh uTh kar

zamīñ ke saath falak ke safar meñ ham bhī haiñ
qafas-nasīb sahī bāl-o-par meñ ham bhī haiñ

meñ dam-ba-ḳhud huuñ mire sar pe sā.ebān-e-falak
baġhair chob ke kyūñ-kar hai īstāda huā

safar ho pātāl kā ki sair-e-falak ho 'sājid'
jahāñ rahūñgā zamīn se rābta rahegā

shab ke safar meñ chāñd sitāre to saath haiñ
kuchh aur mehrbān falak ho to kyā na ho

tire falak hī se TūTne vaalī raushnī ke haiñ aks saare
kahīñ kahīñ jo chamak rahe haiñ hurūf merī ibāratoñ meñ

bā.īñ-hama vus.at bhī hai kyā ḳhvān-e-falak-tañg
āsūda na us kā koī mehmāñ nazar aayā

jinheñ āshiqoñ ne chāhā ki falak se toḌ laa.eñ
kisī raah meñ bichhā.eñ kisī sej par sajā.eñ

vo buland-bām taare vo falak-maqām taare
vo nishān de ke apnā rahe be-nishāñ hamesha

sivā.e yaas na kuchh gumbad-e-falak se milā
sadā bhī dī to palaT kar vahī javāb aayā

pairāhan-e-falak pe jahāñ ḳhatt-e-nūr hai
dāman hai vaañ se chaak vahīñ se uTheñge ham

ai falak ḳhāna-ḳharābī kī hai parvā kis ko
dasht meñ rahte haiñ muddat huī ghar chhoḌ diyā

taab kyā ham-tāb hove us se ḳhurshīd-e-falak
āftāb-e-dāġh-e-dil kī apne tābish aur hai

kis kis kā dil na shaad kiyā tū ne ai falak
ik maiñ hī ġham-zada huuñ ki nāshād rah gayā