Tags-Falak

qurb o dīdār to ma.alūm kisī kā phir bhī
kuchh pata sā falak-e-tafraqa-pardāz to de

karūñ kyā paroñ kā agar in se mujh ko
falak nāpne kī ijāzat nahīñ hai

chāñd ko bāhar falak par chhoḌ kar
vaqt kī andhī guphā meñ

bahut sīdhā banā.ūñgā falak ko
ki is kaj ko kabhī sīdhā na paayā

nigāh jitnī bulandī hogī ye utnī hī arjumand hogī
ba-qadr-e-qurb-e-falak kiran meñ harārat-o-raushnī milegī

is ko bhī gar na falak dekh sake char vaale
aur to kyā hai pareshānī kā asbāb hai yaañ

alassabāh ki thī kā.enāt sar-ba-sujūd
falak pe shor-e-azāñ thā zamīñ pe bāñg-e-durūd

falak par dekh kar taare bhī apnā hosh khote haiñ
pahan kar jis ghaḌī baiThe hai vo rashk-e-qamar motī

na aa.ī ḳhush-ābādī un kī falak ko
na the varna vo to miTāne ke qābil

dikhā.e haiñ afsos vo dil falak ne
na the 'aish' jo dil dikhāne ke qābil

na paayā koī aur un ke sivā kyā
falak kyā vahī the satāne ke qābil

vo jo insān ke hī bas meñ hai us par insāñ
jaane kis muñh se shikāyāt-e-falak karte haiñ

falak se jaise sitāra zamīn par utre
mirī galī meñ vo mahshar ḳhirām aa.e hai

ai falak aisā bhī ik din aa.egā
jab kiye par apne tū pachhtā.egā

falak pe ghor ghaTā.eñ sarāb hone lagīñ
saroñ pe dhuup kā jis vaqt sā.ebān khulā

gardish-muhīt-e-zulm rahā jis qadar falak
maiñ pā.emāl-e-ġhamza-e-chashm-e-kabūd thā

jahāñ jahāñ se nikal kar ye barq girtī hai
vahāñ vahāñ hai ye chāk-e-falak rafū honā

mah-o-mehr-o-anjum falak ke dulāre tirī mumlikat ke hasīñ shāhzāde
hamārī zamīñ kā.enātī hasīna hayāt-āfrīnā hayāt-āfrīnā

zamīñ kā kaleja bahut phuñk rahā hai falak phaT paḌe qulzum-e-ḳhūñ ravāñ ho
jabīn-e-mashiyyat se Tapke pasīna hayāt-āfrīnā hayāt-āfrīnā

falak-āshnā sahī ham magar ehtiyāt lāzim
ki qafas meñ le na jaa.e ye mazāq-e-bāl-o-par bhī