Tags-Falak

zar diyā zor diyā maal diyā ganj diye
ai falak kaun se rāhat ke evaz rañj diye

kahāñ gardish falak kī chain detī hai sunā 'inshā'
ġhanīmat hai ki ham sūrat yahāñ do-chār baiThe haiñ

mirā us ke pas-e-dīvār ghar hotā to kyā hotā
qazā se ai falak gar is qadar hotā to kyā hotā

aah dahqān-e-falak kī kahūñ kyā bad-tuḳhmī
ḳhāk-e-adām meñ ye nit bove hai āfāt ke biij

tā-ba-falak naala to pahuñchā thā raat
maiñ hī kuchh allāh kā Dar kar gayā

mere rūkhe-sūkhe TukḌe mujh ko kar dete haiñ ser
ḳhaak bhar detā falak muñh meñ jo ne.amat māñgtā

hai 'arsh' aaj to fitrat bhī ham-rakāb-e-qazā
ghaTā.eñ auj-e-falak par haiñ bijliyāñ ghar meñ

zamīn saath mirā chhoḌtī hai jab to falak
jhukā ho mire sar par dikhā.ī detā hai

ai falak kuchh to asar husn-e-amal meñ hotā
shīsha ik roz to vaa.iz ke baġhal meñ hotā

falak pe shaam Dhale jo chamakne lagte haiñ
vo terī āñkhoñ meñ aa kar damakne lagte haiñ

nafas ke dayāroñ meñ gholā thā ik lams hī
nikal aa.e saare falak se utāre hue

shikva hameñ kuchh nahīñ falak se
tū ne ai maah ham ko maarā

tire falak hī se TūTne vaalī raushnī ke haiñ aks saare
kahīñ kahīñ jo chamak rahe haiñ hurūf merī ibāratoñ meñ

mailā ho rañg us kā gar chāñdnī meñ nikle
chashm-e-falak ne aisā nāzuk-badan na dekhā

falak kī khūñTī se Tāñgā huā thā ek ḳhayāl
zamīñ pe baiThī tirī baat muskurātī rahī

bahār aa.e muzhda masarrat kā le kar dhuāñ-dhār uTThīñ falak par ghaTā.eñ
idhar jaam chhalke udhar tauba TuuTe baham zohd-o-rindī meñ ho hāthā-pā.ī

maiñ ne dekhā hai falak ko jāgte sote hue
merī āñkhoñ tak to aa.ī chāñdnī jaisī bhī hai

thā falak-gīr talātum shab kā
ham sitāroñ ke safīnoñ meñ rahe

kahā falak ne ye uḌte hue parindoñ se
zamīñ pe log makānoñ meñ qaid rahte haiñ

afsos ki dandāñ kā kiyā rizq falak ne
jin logoñ kī thī dar-ḳhur-e-aqd-e-guhar añgusht