Tags-Falak

ai falak bojh do aalam kā tū 'qā.em' pe na Daal
apnī hastī bhī kuchh in rozoñ garāñ hai us ko

ujāloñ meñ chhupī thī ek laḌkī
falak kā rañg-roġhan kar ga.ī hai

falak pe likkhūñ tirā naam mere naam ke saath
agar kabhī mujhe tāroñ par iḳhtiyār mile

baiThā thā maiñ hisār-e-falak meñ zamīn par
dushman ne fat.h khīñch lī merī shikast se

na taare afshāñ na kahkashāñ hai namūna hañstī huī jabīñ kā
khulā hai parcham gaḌā hai jhanDā falak par us āh-e-ātishīñ kā

maiñ is zamīn kī vus.at pe sair kartā huuñ
falak ke chāñd sitāroñ kā rāz-dāñ ban kar

uḌe haiñ jo tire qadmoñ se ḳhaak ke zarre
chamak rahe haiñ falak par vo kahkashāñ ban kar

kahāñ thī ye jab tak ki zāhir na thī
falak par ki zer-e-zamīñ raat thī

hai āftāb piyāla farishta-ḳhū saaqī
ḳham-e-falak hai subū-e-sharāb-ḳhāna-e-ishq

ye kah ke phirtī hai din raat āsiyā-e-falak
mile to ḳhirman-e-mah de ke luuñ maiñ dāna-e-ishq

ye kyā huā hai raat ko kyūñkar niDhāl hai
merī hī tarah chāñd falak par niDhāl hai

vo chāñd TuuT gayā jis se raat raushan thī
chamak rahe the falak par jo sab sitāre ga.e

DhūñDhtā hai ab kise le kar charāġh-e-āftāb
kyuuñ miTāyā ai falak tū ne nishān-e-lucknow

falak hai kyuuñ qaid-e-mustaqil meñ
zamīñ pe harf-e-najāt kyā hai

ham ḳhaak ke zarroñ meñ haiñ 'aḳhtar' bhii, guhar bhī
tum bām-e-falak se, kabhī utro to patā ho

falak se mujh ko shikva hai zamīñ se mujh ko shikva hai
yaqīñ maano to ḳhud apne yaqīñ se mujh ko shikva hai

dikhā.ī detā hai ik aks chāñd tāroñ meñ
sajātā rahtā hai rāheñ falak mohabbat kī

taqdīr ne kyā qutub-e-falak mujh ko banāyā
mohtāj mirā paañv rahā ḳhāna-e-zīñ kā

diye dukh bhī to jī bhar ke na ham ko
falak tū kyā hai terā hausla kyā

'zafar' basant bhī hai aur bahār kī rut bhī
falak pe taḳhta-e-gul kā gumāñ guzartā hai