Tags-Falak

utarne vaale abhī tak na baam se utre
taḌapne vaale taḌap kar falak ko chhū aa.e

falak ko hai aarzū ki jhuk kar maiñ apne taare karūñ nichhāvar
huī hai makka kī sar-zamīñ pe ye aaj kis mah-laqā kī aamad

ab zamīnoñ ko bichhā.e ki falak ko oḌhe
muflisī to bharī barsāt meñ be-ghar huī hai

le aa.e toḌ toḌ ke taare falak se ham
lekin nasīb quvvat-e-husn-e-bayāñ kahāñ

kisht-e-falak meñ Daal ke ḳhūn-e-shafaq kī khaad
tāroñ kī ek fasl ugātī rahegī shaam

us ke bām-falak-āsār kī tasvīr meñ gum
merī taḳh.īl banātī rahī ziine shab-bhar

aise khulte haiñ falak par ye sitāre shab ke
jis tarah phuul hoñ saare ye bahār-e-shab ke

falak ne sañg pheñkā tafraqe kā
hue do-chār sāhib-dil jahāñ jam.a

falak-gīrī kī ḳhvāhish bāl-o-par ko raakh kar degī
havas-rāno parindoñ kī uḌāneñ ghaTtī baḌhtī haiñ

shab ko naala jo mirā tā-ba-falak jaatā hai
sub.h ko mahr ke parde meñ chamak jaatā hai

falak par hī sitāroñ kā koī unvān hotā hai
kisī TuuTe sitāre kā pata kuchh bhī nahīñ hotā

ai falak ham tujhe zālim nahīñ kahte lekin
ġhaur se sun ki sadā-e-lab-e-duniyā kyā hai

ham ko is hausle pe kyuuñ ki falak de sāmāñ
shikva-e-bār hai aur minnat-e-sar kuchh bhī nahīñ

nishāna-bāz falak tere nāvakoñ kī ḳhair
ki jin kī zad pe mire hausloñ kī chhātī hai

nidā falak se ye aa.ī ki tū malāl na kar
kisī bhī haal meñ bebas hai ye ḳhayāl na kar

gardish-e-daurāñ muḳhālif hai na hai dushman falak
barsar-e-paikār mujh se merī qismat ho to ho

qayāmat hai shab-e-vāda kā itnā muḳhtasar honā
falak kā shaam se dast-o-garebān-e-sahar honā