Tags-Falak

qubūl thā ki falak mujh pe sau jafā kartā
par ek ye ki na tujh se mujhe judā kartā

sadā-e-har-sū falak ke gumbad meñ gūñjtī hai
havā na Thahre havā na Thahre havā na Thahre

chhanvā.ī ḳhaak 'mehr'-e-falak-bārgāh ko
chhoTī sī ek chiiz baḌā kaam kar ga.ī

kis auj-mauj meñ mujh par khulā hai ye ahvāl
zamīñ se tā-ba-falak uḌ rahī hai merī ḳhaak

vo raat ko pa.e gul-gasht jab nikalte haiñ
falak pe chāñd-sitāroñ ke dil machalte haiñ

merī navā-e-aman be-navā nahīñ hai ai falak
abhī bhī jism-e-nā-tavāñ meñ bolne kī jaan hai

hai uḌānoñ kā silsila har-sū
ab zamīñ kī tarah falak hai kyā

na kaam aayā un aahoñ kā falak ke paar ho jaanā
mire sone se mushkil thā tirā bedār ho jaanā

kyā pūchhte ho dard ke māroñ kī zindagī
ya.anī falak ke Dūbte tāroñ kī zindagī

ho gayā hasrat-e-parvāz meñ dil sau TukḌe
ham ne dekhā jo qafas ko to falak yaad aayā

ka.ī sar se guzrīñ qayāmateñ paḌīñ ham pe laakh musībateñ
diiñ falak ne kitnī aziyyateñ tumheñ dil se ham na bhulā sake

falak qātil hai teġh-e-māh-e-nau ke zaḳhm haiñ tan par
shafaq hai ḳhuuñ hamārā chāñdnī ne ham ko maarā hai

vo mah-rū ai falak phirtā hai har shab merī āñkhoñ meñ
tasavvur ne mire ġham-ḳhāne meñ ik chāñd taarā hai

qafas meñ thā to parinda chahaktā rahtā thā
magar falak pe vo apnī uḌaan chhoḌ gayā

tamām sūrat-e-hālāt inqilābī hai
falak shikasta zamīñ pā.emāl dekhtā huuñ

tirī jafā kā falak se na tazkira chheḌā
hunar kī baat kisī kam-hunar se kyā karte

uḌaan bharne ke hai vāste falak saarā
haiñ bāzuoñ meñ jo pinhāñ vo bāl-o-par DhūñDo

nairañgiyāñ falak kī jabhī haiñ ki hoñ baham
kaalī ghaTā safed pyāle sharāb-e-surḳh

khulīñ jo āñkheñ to sar pe niilā falak tanā thā
chahār-jānib siyāh paanī kī tund maujoñ kā ġhalġhala thā

jhaḌe jo tirī kafsh-e-zarrīñ ke zarre
falak par vo jā kar sayyāre hue haiñ