Tags-Falak

murdoñ se shart bāñdh ke soī hai apnī maut
haañ dekhnā zarā falak-e-pīr dekhnā

abhī vo chāñd falak se utar ke aa.egā
ye ek ḳhvāb hameñ bārhā dikhāyā gayā

ai falak un ko nahīñ bhātā sitāroñ kā bhī joḌ
kahte haiñ merī balā pahne kuñvārī chūḌiyāñ

vo maah chhupāyā tū ne kahāñ hai jis se jigar par daaġh mire
sūrat to dikhā de mujh ko zarā jaldī se falak phir vaisī hī

falak se rahh-numā.ī 'dinesh' ne kī thī
savāl uThtā kahāñ zulmatoñ se Darne kā

kahīñ falak pe saraktī hai sarsarātī huī
kahīñ diloñ kī fazā meñ patañg uḌtī hai

be-hukm yuuñ kisī ko satātā nahīñ falak
mujh par ye zulm aap ke irshād se huā

kabhī kabhī to baraste hue bhī dekhā hai
falak pe kaalī ghaTā se likhā huā ik naam

phirtā hai falak fikr meñ gardish meñ ye sab kī
hargiz ye nahīñ chāhtā bahbūd-e-ḳhalā.iq

falak ke ḳhvān upar us kī tañg-chashmī se
kabhū nazar na paḌī mehmān kī sūrat

chamak rahā thā falak pe sūraj nayā nayā sā
luTā chukī thī ḳhazāne shabnam na.e na.e se

tārīk ho na paa.e kabhī dāman-e-falak
palkoñ se tā-ba-sub.h sitāre jalā.iye

banā kar sāneha koī tamāshā ye karātā hai
falak ma.asūm logoñ ko bahut aañsū rulātā hai

falak ko dekh ke kartā huuñ us ko yaad 'asad'
jafā meñ us kī hai andāz kār-farmā kā

qahr lā.eñge ye tāle.a jo zarā bhī chete
ai falak ḳhvāb se un ko na jagānā hargiz

falak se roz utarte haiñ raushnī ke ḳhutūt
magar na chamke muqaddar ġharīb-ḳhānoñ ke

jazb ho kar rah ga.ī haiñ āshiyāñ meñ bijliyāñ
ab falak ko us ke hī sho.aloñ se phūñkā chāhiye

naale nikal ke dil se agar arsh tak ga.e
jā.eñge ai falak ye tirī chhat liye hue

chamakte chāñd sitāro gavāh tum rahnā
lagī rahī haiñ falak se tamām shab āñkheñ