Tags-Falak

falak ne bhūl-bhulayyoñ meñ Daal rakkhā thā
ham un ko DhūñDte yā apnī justujū karte

achchhā huā āḳhir mirī qismat meñ sitam the
tum mil ga.e mujh ko falak-e-pīr se pahle

ne.amat-e-alvān bhī ḳhvān-e-falak kī dekh lī
maah nān-e-ḳhām hai aur mahr nān-e-soḳhta

mire safar ko to sadiyāñ guzar ga.iiñ lekin
falak pe ab bhī hai qaa.em nishān-e-pā merā

agarche siine meñ saañs bhī hai nahīñ tabī.at meñ jaan baaqī
ajal ko hai der ik nazar kī falak to kaam apnā kar chukā hai

mātamī kapḌe pahan liye the merī zamīñ ne
aur falak ne chāñd sitāra pahan liyā thā

go ki detā thā falak mol meñ dil ke do-jahāñ
itnī qīmat pe to is maal ko Daalā na gayā

kī be-zarī falak ne havāle najīb ke
paajī har ek sāhab-e-zar aa.e hai nazar

larzish bhī hai sat.h-e-falak par gardish karte sitāroñ kī
vaqt kā ik Thahrāo bhī hai is aurañg-ḳhayālī meñ

āhista āhista ik ik buuñd falak se Tapkī hai
khīñch ik sannāTe kī fazā bhī shabnam kī ujyālī meñ

taare nahīñ falak pe tumhāre nisār ko
laayā hai motiyoñ se ye bhar bhar ke jholiyāñ

ai mah-e-āsmān-jāh tujh sā nahīñ hai kaj-kulāh
le ke falak charāġh-e-māh DhūñDh phirā galī galī

bas ai falak nashāt-e-dil kā intiqām ho chukā
hañsā thā jis qadar kabhī ziyāda us se ro chukā

na dam le ai sarishk-e-ġham tujhe qasam hai ishq kī
falak ko chhoḌtā hai kyuuñ agar mujhe Dubo chukā

ai zamīñ aaj bhī zarre haiñ tire mahr-tarāsh
ai falak aaj bhī laḌte haiñ tire qahr se log

gardūñ se aaj hai falak-e-zulm phaT paḌā
siina meñ aaj hī dam-e-ātish-fishāñ na thā

Tapkā zamīñ pe gar falak-e-pīr ko to kyā
phir ye kaheñge sab ki vo kuchh naujavāñ na thā

ab āsmāñ ban ke mirā mudda.ī banā
thī lab pe kuchh fuġhāñ to falak kā nishāñ na thā

mirā kirdār duniyāñ meñ shahādat se munavvar hai
nazar aa.eñ falak par sab ko raushan surḳhiyāñ merī

dam meñ Dālegā mirā nāla-e-shab-gīr nikāl
naak kī raah dimāġh-e-falak-e-pīr kī bū