Tags-Falak

subuk-sarī ke liye tum ne kyā kiyā 'rāshid'
falak se shikva-e-bār-e-girāñ to hotā rahā

falak-e-sifla be-muhābā hai
is sitam-gar ko infi.āl kahāñ

falak ko chhūne kī ḳhvāhish hazār dil meñ liye
ki sargirāñ hai hamārī uḌaan bhī ham bhī

falak pe chāñd sitāre hasad se jalte haiñ
maiñ apnī quvvat-e-parvāz muḳhtasar kar luuñ

ai falak ham to baiThe hañste the
uThte uThte rulā diyā kis ne

tirī talāsh meñ khoī huī hai chashm-e-falak
zamīñ ke rāj-dulāre kahāñ hai kuchh to batā

duur us paar shafaq rañg guphāoñ se pare
zer-e-mehrāb-e-falak qāfila-e-umr-e-ravāñ

mirī pursish ko aa pahuñchā hasīñ banda koī varna
falak se aaj tak merī madad ko rab nahīñ utrā

tū hukm de to sitāroñ ko chhīn lā.ūñ maiñ
falak se us ke nazāroñ ko chhīn lā.ūñ maiñ

logoñ se ab to koī bhī shikva nahīñ hameñ
jab ye falak hī dushman-e-jāñ is qadar huā

ho rif.at-e-ḳhayāl terī tā-falak 'anīs'
alfāz aur ma.ānī hoñ jauhar kamāl ke

is adā se tiir lagāve thā tū ba-rū-e-tūda-e-musht-e-gul
ki falak ba-teġh-o-kamān bhī tirā mahv-e-kund-o-kadār thā

rātoñ ko tujh se jāgnā gar koī pūchhe 'mus.hafī'
chasm-e-sitāra baaz haiñ us ko falak dikhā ki yuuñ

har ek shīsha-e-sā.at falak ko kahtā hai
ki 'muntahī' se sarāsar ġhubār rakhtā hai

hamāre ashk aur aah kī maujeñ bāñdh detī haiñ sab jo duurī
bane haiñ māh-e-falak pe haale ze-āb avval do.am ba-ātish

havā ne jab bhī uḌāyā ga.ī falak kī taraf
ajiib ḳhaak thī jo ḳhaak meñ milī hī nahīñ

sū-e-falak kiije rū-e-tābāñ ki chaudhvīñ shab pe hai ye nāzāñ
dikhā ke husn-e-shabāb apnā chakor karne qamar ko chaliye

zarre phir mā.il-e-ram haiñ 'nāsir'
phir unheñ sair-e-falak yaad aa.ī

ham vo falak haiñ ahl-e-tavakkul ki misl-e-māh
rakhte nahīñ haiñ nān-e-shabīna barā-e-sub.h

nahīñ ye abr-o-bārāñ 'soz' ke ahvāl ko sun kar
falak kī bhī mohabbat se ye ab chhātī bhar aa.ī hai