Tags-Falak

ḳhadañg aah kā ai falak be-tarah hai
bharosā tū tāroñ kī mat kar zirah kā

kyuuñ kibr-o-ġhurūr is daur pe hai kyuuñ dost falak ko samjhā hai
gardish se ye apnī baaz aayā yā rañg badalnā chhoḌ diyā

maiñ tār-tār 'zafar' ho gayā huuñ jis ke sabab
falak ke chaak usī fikr se rafū hue haiñ

dar-ba-dar phirne ne merī qadr khoī ai falak
un ke dil meñ hai jagah miltī jo ḳhalvat māñgtā

'sajjād' bhī malūl hai ki qāfila hai shaam kā
falak pe ek chāñd hai jo āḳhirī sahārā hai

tañg ushshāq haiñ zālim tirī bedād se ab
un ke kāñpe hai falak nāla-o-fariyād se ab

tirī talab ne falak pe sab ke safar kā anjām likh diyā hai
kisī ko najm-e-sahar kisī ko sitāra-e-shām likh diyā hai

chaar chup chīzeñ haiñ bahr-o-bar falak aur kohsār
dil dahal jaatā hai in ḳhālī jag.hoñ ke sāmne

sū-e-falak na jānib-e-mahtāb dekhnā
is shahr-e-dil-navāz ke ādāb dekhnā

jo rotā khol kar dil tañgnā-e-dahr meñ āshiq
to jū-e-kahkashāñ meñ bhī falak par ḳhuuñ ravāñ hotā

falak ke chāñd ko chhūne kī zid meñ
'razā' jī par hamāre ug rahe haiñ

falak chūme hai dhartī ke laboñ ko
ki dhartī se kināre ug rahe haiñ

guftugū to tujh se thī rū-ba-rū maiñ ḳhud se thā
ik falak sā hañgāma ik zamīn ḳhāmoshī

TuuTe paḌte haiñ falak se bhī sitāre paiham
chunñe baiThā hai jo afshāñ vo qamar aaj kī raat

duur falak se ik din maiñ bhī ubharūñgā
phir Thokar meñ duniyā rakh kar sochūñgā

kahīñ thī raakh kahīñ thā dhuāñ kahīñ thī aag
falak Dhakā thā sitāroñ se jab zamīñ thī aag

shaam aa.ī nahā kar tire husn meñ
chāñd taare falak par nikharte rahe

dil-e-bad-ḳhvāh meñ thā mārnā yā chashm-e-bad-bīñ meñ
falak par 'zauq' tīr-e-āh gar maarā to kyā maarā

aadhā falak ke paas thā aadhā zamīn par
maiñ nā-tamām ḳhvāb thā badar-e-munīr kā

falak se pūchhūñ to kaise pūchhūñ
ki marne vaale ne zindagī kī talāsh kī thī