Tags-Falak

har lafz kañkarī kī tarah ġhair par girā
apnī duā falak pe abābīl ho ga.ī

hañste rahe falak pe sitāre zamīñ pe phuul
achchhā huā ki umr milī muḳhtasar mujhe

falak kañgāl hai ab pūchh liije
sahar ne muñh dikhā.ī meñ liyā kyā

falak kī gardisheñ aisī nahīñ jin meñ qadam Thahre
sakūñ dushvār hai kyūñkar tabī.at koī dam Thahre

'ālim' falak-e-tafraqa-pardāz kā Dar hai
bante hī bigaḌ jaa.e na taqdīr hamārī

sahāb ban kar falak se barse
ise jo dariyā meñ Daal aao to ik samundar kā ruup dhāre

āsmān mehr-e-falak rū-e-zamīñ arsh-e-barīñ
peshtar is se ḳhudā jaane huā kyā kyā kuchh

koī nahīñ jo miTā.e mirī siyah-baḳhtī
falak pe kitne sitāre haiñ jagmagā.e hue

māh-e-nau chuum hī le us ko falak se gir kar
pheñk deve jo vo nāḳhun pas-e-dīvār tarāsh

har ek dāman-e-gul par falak ke aañsū haiñ
ḳhizāñ kī maut se yuuñ zīnat-e-bahār na ho

ḳhvāhish se kab ye haath falak tak pahuñchtā hai
jo kah rahā huuñ maiñ use kar ke dikhā.ūñgā

falak ke rañg zamīñ par utārtā huā maiñ
tamām ḳhalq ko hairat se mārtā huā maiñ

tum to ai mehrbān anūThe nikle
jab aan ke paas baiThe rūThe nikle

hāthoñ meñ mire chāñd bhī lagtā hai khilaunā
ḳhvāboñ meñ falak rañg samone ke liye huuñ

tumhīñ se rū-e-zamīñ mo.attar tumhīñ se sat.h-e-falak munavvar
tumhīñ to ho phuul yāsmīñ kā tumhīñ to ho chāñd chaudhvīñ kā

ik chāñd hai āvāra-o-betāb o falak-tāb
ik chāñd hai āsūdgī-e-hijr kā maarā

ek shab to vasl-e-jānāñ kī tavāzo ai falak
chaar din mehmān tere ghar meñ maiñ be-chāra thā

har haal meñ ġharaz 'ishq' dād-e-junūñ hai denī
sar phoḌte falak se hote agar malak ham

qadīm se haTe to ham jadīd meñ ulajh ga.e
nikal ke gardish-e-falak se mausamoñ ke jaal meñ

tere dāman meñ sitāre haiñ to hoñge ai falak
mujh ko apnī maañ kī mailī oḌhnī achchhī lagī