Tags-Falak

vo naala falak se Takrāyā vo 'ārzū' ik taarā TuuTā
dushman kī taraf jo lapkā thā sho.ala vo mujhī par aa ke girā

ḳhurshīd aap le ke chalā tujh ko saa.e saa.e
terī muvāfaqat meñ falak vāzhgūñ huā

utar aa.e haiñ zamīñ par bhī falak se taare
dāman-e-charḳh meñ ai dosto kyā rakkhā hai

aañsū falak kī aañkh se Tapke tamām raat
aur sub.h tak zamīn kā āñchal bhigo ga.e

sahar qarīb hai armāñ udaas dil ġham-gīñ
falak pe chāñd sitāroñ ko niind aa.ī hai

merī shab-e-vasl kī sub.h chalī aatī hai
rok le is dam falak ek ghaḌī aur bhī

falak se jab na.ī kirneñ utartī haiñ
guhar sā shabnamī qatra chamaktā hai

kitnī jaldī mailī kartā hai poshākeñ roz falak
sub.h hī raat utārī thī aur shaam ko shab pahnā.ī bhī

falak ai kaash ham ko ḳhaak hī rakhtā ki is meñ ham
ġhubār-e-rāh hote yā kasū kī ḳhāk-e-pā hote

dil hī miltā nahīñ sifloñ se vagarna 'shiblī'
ḳhuub guzre falak-e-dūñ se jo yaarī kar luuñ

falak-e-ishq pe tā-der Thaharnā hai muhāl
is bulandī se utāre bhī nahīñ jā sakte

zer-e-dīvār-e-sanam qabr meñ sotā huuñ falak
kyuuñ na ho tāla-e-bedār par ab naaz mujhe

jaane kis lamha-e-vahshī kī talab hai ki falak
dekhnā chāhe mire shahr ko jañgal kar ke

tujhe naḳhīl-e-falak se paTaḳh na duuñ āḳhir
tire samet girā hī na duuñ machān ko maiñ

muft tak to koī 'qā.em' nahīñ lene kā ye jins
kah falak se kare kuchh aur bhī arzāñ mujh ko

sitāroñ meñ ye kaisī khalbalī hai
falak par aa gayā sūraj nayā kyā

zamīn farsh falak sā.ebān likhte haiñ
ham is jahān ko apnā makān likhte haiñ

falak pe aaj sitāroñ ko DhūñDne vaale
mirī nazar ke sitāroñ kā kuchh shumār kareñ

nazar se tirī jis ne ham ko girāyā
falak se uThā kar ke maarā zamīñ par

nahīñ hai ye āh-e-falak sā ki ham ne
alam shor-e-saudā kā gāḌhā zamīñ par