Tags-Gham

mire ashk-e-mohabbat se diloñ ke mail dhul jaa.eñ
mirā ġham zindagī ke kaam aa jaa.e to achchhā ho

qurb ke sadme huuñ yā duurī kā ġham
jitnā sahnā thā mohabbat sah ga.ī

yā maiñ huuñ yā merā dil hai
roz nayā ġham paane vaalā

nigāh-o-ruḳh par hai likhī jaatī jo baat lab par rukī huī hai
mahak chhupe bhī to kaise dil meñ kalī jo ġham kī khilī huī hai

baḌh ke lenā hai hameñ jur.at-e-īsār se kaam
hā.il-e-rāh-e-junūd-e-ġham-o-āzār sahī

haa.e kitnā latīf hai vo ġham
jis ne baḳhshā hai zindagī kā shu.ūr

ġham-e-ishq hī ne kaaTī ġham-e-ishq kī musībat
isī mauj ne Duboyā isī mauj ne ubhārā

pūchhā ki 'muztar' kyuuñ kiyā bole ki dil chāhā mirā
pūchhā tasallī kaun de bole ki ġham-ḳhvārī mirī

qatra qatra zindagī ke zahr kā piinā hai ġham
aur ḳhushī hai do ghaḌī pī kar bahak jaane kā naam

tere ġham se milī dil ko vo zindagī
tujh se bhī kar diyā hai hameñ be-niyāz

mahtāb ke hujūm meñ gum ho ga.ī thī raat
phir qahr ban gayā ġham-e-daurāñ tire baġhair

ġham ke pīchho raast kahte haiñ ki shādī hove hai
hazrat-e-ramazāñ ga.e tashrīf le ab iid hai

tum ko merā ġham hai sāthī
kaise ab is ġham ko bhulā.ūñ

achchhā merā ġham na bhulāo
merā ġham har ġham meñ samolo

mere ġham ko mere shā.er
apne javāñ gītoñ meñ rachā lo

mere ġham kī aañch se sāthī
chauñk uThegā azm tumhārā

mere ġham kā ġham na karo tum
achchhā ab se ġham na karūñgī

mire chehre se ġham ā.ankhoñ se hairānī na jā.egī
yahī sūrat rahegī aur pahchānī na jā.egī

sahne ko to sah jaa.eñ ġham-e-kaun-o-makāñ tak
ai ḳhāliq-e-har-dard magar phir bhī kahāñ tak

tasvīr-e-ruḳh-e-yār khiñchī jaatī hai 'yāvar'
miltī hai fareb-e-ġham-e-daurāñ se kahāñ tak