Tags-Gham

maiñ itnī raushnī phailā chukā huuñ
ki bujh bhī jā.ūñ to ab ġham nahīñ hai

dosto tum ne ajab ye ehtimām-e-ġham kiyā
qatl sūraj kar diyā phir raat bhar mātam kiyā

raushnī tāroñ se hotī hai na sham.oñ se ziyā
kyā zamāne kī siyāhī mere ġham-ḳhāne meñ hai

maiñ jo rotā huuñ to rotā hai zamāna mere saath
ġham zamāne-bhar kā 'shaukat' mere afsāne meñ hai

ham ne har ġham dil-e-sad-chāk se bāhar rakkhā
aag ko pairahan-e-ḳhāk se bāhar rakkhā

ġham kī duniyā bhī bil-āḳhir luT ga.ī ḳhushiyoñ ke baad
hādisa ye bhī huā 'parvez'-rahmānī ke saath

kitāb-e-zīst hai yaksar hikāyat-e-ġham-e-dil
hikāyat-e-ġham-e-dil harf-e-nā-tamām bhī hai

rastoñ pe añdhere phail ga.e ik manzil-e-ġham tak shaam huī
ai ham-safaro kyā faisla hai ab chalnā hai ki Thaharnā hai

jaanā sambhal ke ai dil-e-betāb bazm meñ
hai chashm-e-nāz mahshar-e-ġham-zā liye hue

lā ġham hī Daal de mire dast-e-savāl meñ
maiñ kyā karūñ ḳhushī ko jo terī ḳhushī nahīñ

tirī judā.ī meñ jān-e-ālam kiyā hai donoñ ko ġham ne be-dam
banā.iye jā ke dil kī turbat ki dafn karne jigar ko chaliye

jab bhī ġham-e-zamāna se āñkheñ huiiñ do-chār
muñh pher kar tabassum-e-dil par nigāh kī

shahr-e-ḳhurshīd ke logoñ ko ḳhabar do koī
din ke ġham Duub ga.e raat ke paimānoñ meñ

ġham mirā bāñTtī hai tanhā.ī
mujh ko tanhā udaas rahne de

ai merī tamannā ke sitāre tū kahāñ hai
tū aa.e to ye jism shab-e-ġham ko na sauñpūñ

dil ko taufīq-e-ziyāñ ho to ġhazal hotī hai
zahr-e-ġham bāda-chukāñ ho to ġhazal hotī hai

nahīñ gar naġhma-e-shādī nafīr-e-ġham sahī koī
ki sāz-e-zindagānī be-sadā achchhā nahīñ lagtā

sub.h-e-nau phir se jaag jā.egī
shām-e-ġham ko sulā ke dekho tum

muskurānā adā sahī phir bhī
lazzat-e-ġham uThā ke dekho tum

qīmtī thā havā-e-ġham ke liye
ek dil kā diyā hamesha se