Tags-Gham

kyuuñ nahīñ insāñ samajhtā uns ko rāh-e-hayāt
sham.a kī mānind is ġham meñ ghulā jaatā huuñ maiñ

sho.ala-e-ulfat madad ai chāra-sāz-e-ġham madad
sard-mehrī se jahāñ kī bujh ke rah jaatā huuñ maiñ

mauja-e-reg-e-ravān-e-ġham meñ bah ke dekhnā
muflisī meñ dostoñ ke saath rah ke dekhnā

itne zaḳhm dikhātā huuñ maiñ aa.e din
mujh ko to ġham-ḳhvār bhī bāteñ karte haiñ

haa.e kyā chiiz hai mahrūmī-o-ġham kā rishta
mil ga.e ziist ke har moḌ pe ġham-ḳhvār bahut

ghaas se bach ke chalo ret ko gulzār kaho
narm kaliyoñ pe chaḌhā do ġham-e-daurāñ ke ġhilāf

be-samjhe na jām-e-ġham piyā thā maiñ ne
ye kaam to jaan kar kiyā thā maiñ ne

ġham-e-hayāt ko likkhā kitāb kī mānind
aur ek naam ki hai intisāb kī mānind

sīna-e-shā.ir ġham se bharā hai aañkh magar namnāk nahīñ hai
roz-e-azal se hai dīvāna dāman lekin chaak nahīñ hai

hijr ke ġham meñ rone vaale terā alam duniyā kī nazar meñ
kal bhī ibrat-nāk nahīñ thā aaj bhī ibrat-nāk nahīñ hai

zamāne bhar ke ranj-o-ġham kabhī mujh ko diye us ne
kabhī jab laḌkhaḌāyā to mujhe baḌh kar sambhālā hai

sarmāya-e-dil āḳhir aur is ke sivā kyā hai
har dard se rishta hai har ġham se shanāsā.ī

ilāj-e-dard-e-dil-e-sogvār ho na sakā
vo ġham-navāz rahā ġham-gusār ho na sakā

atā kiyā jise tū ne ġham-e-mohabbat-e-dost
vo dil asīr-e-ġham-e-rozgār ho na sakā

dūd-e-dil se hai ye tārīkī mire ġham-ḳhāna meñ
sham.a hai ik sozan-e-gum-gashta is kāshāna meñ

pattharoñ meñ Thokareñ khātā hai nāhaq sail-e-āb
pūchho kyā le jā.egā aa kar mire ġham-ḳhāna meñ

jis meñ bah jaa.e safīne kī tarah merā vajūd
merī āñkhoñ se ravāñ ġham kā vo dariyā bhī nahīñ

ai nigār-e-ġham-o-ālam tirī umr darāz
tū ne baḳhshe bahut ārām tirī umr darāz

haañ junūñ-ḳhezī-e-dil rehn-e-masarrat na huī
ḳhush huī vahshat-e-ġham jab rasan-o-dār mile

kyuuñ yaqīñ rakkheñ ḳhayāl-o-ḳhvāb par
jam na jaa.e gard-e-ġham a.asāb par