Tags-Gulshan

kis lagan kis tamannā se kis chaav se mausam-e-rañg-o-nik.hat ko dī thī sadā
kyā ḳhabar thī ki abr-e-bahār-āfrīñ aag ke phuul gulshan pe barsā.egā

taġhāful mat karo ai nau-bahār-e-gulshan-e-ḳhūbī
tumhāre bin nipaT be-āb hai dil kā chaman pyāre

mausam se saaz ġhairat-e-gulshan se be-niyāz
hairat hai mujh ko apne chaman ke subhāv par

zamāna kah rahā hai tum ne gulshan hī miTā Daalā
muravvat bartaraf lo aaj aisā ham bhī kahte haiñ

sāvan sho.ale bhaḌke gulshan gulshan aag lagī
kaisā sūraj ubhrā jis ne sub.h ko ātish-nām kiyā

kabhī āñdhī kabhī tūfāñ kabhī sho.ale kabhī barq
mere gulshan pe bhī guzre haiñ zamāne kyā kyā

junūñ meñ jā-ba-jā ham jo lahū rote haiñ sahrā meñ
guloñ ke shauq meñ vīrāne ko gulshan banāte haiñ

zehn meñ yādoñ ke gulshan dil meñ azm-e-jū-e-shīr
ik nayā farhād paatā huuñ jidhar jaatā huuñ maiñ

hamārī sair ko gulshan se kū-e-yār behtar thā
nafīr-e-bulbuloñ se nāla-hā-e-zār behtar thā

gulshan ke dil meñ aaj bhī mahfūz haiñ vo phuul
murjhā ga.e jo dāġh-e-bahārāñ liye hue

gulshan-e-duniyā hai nairañgī ke saath
aur kuchh us kī ravish paate haiñ ham

anjām-e-fasl-e-gul pe nazar thī vagarna kyuuñ
gulshan se aah bhar ke nasīm-e-sahar ga.ī

kis qadar hotā hai tārāj sukūn-e-gulshan
phuul se tū zarā titlī ko girā kar dekho

yā sāya-e-gul kā hai ye karam yā farq hai daane paanī kā
panchhī to vahī haiñ gulshan meñ pahlī sī magar parvāz nahīñ

har barg-e-hasīñ ko dete haiñ zaḳhmoñ ke mahakte nazrāne
kāñToñ se baḌā is gulshan meñ phūloñ kā koī dam-sāz nahīñ

phuul rote haiñ ḳhaar hañste haiñ
dekh! gulshan kā ye nazārā bhī

ham ko is kī kyā ḳhabar gulshan kā gulshan jal gayā
ham to apnā sirf apnā āshiyāñ dekhā kiye

toḌ kar apne gulshan se taaza gulāb
merī ḳhātir vo laa.e ġhazal ho ga.ī

taqayyud habs kā āzādiyāñ dil kī nahīñ khotā
qafas ko bhī banā lete haiñ gulshan āshiyāñ vaale