Tags-Gulshan

kitne gulshan ki saje the mire iqrār ke naam
kitne ḳhanjar ki mirī ek nahīñ par chamke

batlā.eñ Thikānā kyā chhuTe hue gulshan meñ
guzroge to dekhoge ik shāḳh jalī hogī

afsar-e-ḳhūbāñ 'jalālī' Thahrā hai jab se koī
gulshan-e-dil zebā hai firdaus-e-rizvāñ kī tarah

mire gulshan kā har ik phuul murjhāyā huā sā hai
kabhī kaliyoñ ke lab par muskurāhaT aa hī jā.egī

sabhī shāmil the yaaro yuuñ to gulshan kī tabāhī meñ
ab itnā saaf kyā kahiye ki un meñ bāġhbāñ bhī thā

bahār aa.ī khile ġhunche magar ai nāzim-e-gulshan
hamāre āshiyāñ kī sho.ala-sāmānī nahīñ jaatī

chaar din jo kuchh tamāshā dekhnā hai dekh le
sair ko phir gulshan-e-duniyā meñ aatā kaun hai

ḳhudā mahfūz rakkhe ḳhauf-e-āseb-e-asīrī se
maiñ gulshan meñ bhī āzādī kā naġhma gā nahīñ saktā

shaam gul hotī chalī jaatī hai rafta rafta
sham-e-gul jaltī nahīñ gulshan-e-dīdār meñ ab

jis taraf bhī dekhiye saaya nahīñ
phir bhī gulshan hai koī sahrā nahīñ

gul hai shabnam se aah dīda-e-tar
bin vo gul-rū ke sub.h-e-gulshan meñ

gulshan pe lapakte kauñde ko bulbul kī sadā se ḳhush karnā
gulshan ke muhāfiz kī hai ḳhushī shāyad barbādi-e-kāmil meñ

sūraj ne tezāb hai chhiḌkā shāḳhoñ par
gulshan ko kyā rañgat zinda rakhtī hai

gulshan gulshan vīrānī hai jañgal jañgal sannāTā
haa.e vo din jab har manzil meñ shorish-e-ġham kā kaal na thā

ham gulshan-e-hairat meñ haiñ parvāz kahāñ kī
juuñ bulbul-e-tasvīr kabhī Tuk na hile par

kyā ye insāf hai ai ḳhāliq-e-sub.h-e-gulshan
koī hañstā hai koī girya-kunāñ hotā hai

gulshan kī faqat phūloñ se nahīñ kāñToñ se bhī zīnat hotī hai
jiine ke liye is duniyā meñ ġham kī bhī zarūrat hotī hai

jo dekhī nargis-e-bīmār gulshan meñ to bas ham ko
bahut riqqat huī aur nā-tavānī apnī yaad aa.ī

vāraftgān-e-shauq kā shikva sune baġhair
gulshan supurd-e-ahl-e-jafā kar diyā gayā

sirf ḳhushbū kī kamī thī ġhaur ke qābil 'qatīl'
varna gulshan meñ koī bhī phuul murjhāyā na thā