Tags-Gulshan

zabt karte karte āḳhir phuuT niklī dil kī baat
hañs paḌā gulshan meñ jo bhī ġhuncha-e-ḳhāmosh thā

mausam-e-lāla-o-gul ahd-e-bahār-e-gulshan
ye kahīñ aap kā andāz-e-tabassum to nahīñ

'zafar' aaj dil kā aalam hai ajab maiñ kis se pūchhūñ
vo sabā kidhar se aa.ī jo khilā ga.ī ye gulshan

jab gulshan-e-dahr meñ thā maskan merā
phūloñ se bharā huā thā dāman merā

ḳhaas vaqt-e-yād-e-gulshan aur merā chheḌnā
shab ko bhī sayyād mere zab.h se ġhāfil na thā

agar dekhoge aks us ḳhat kā merī chashm-e-giryāñ meñ
lab-e-jū par bahār-e-sabza-e-gulshan na dekhoge

'mīr' ke sher kā ahvāl kahūñ kyā 'ġhālib'
jis kā dīvān kam-az-gulshan-e-kashmīr nahīñ

bhalā gul kyā tirā ham-sar ho jis kī ye haqīqat hai
abhī gulshan meñ dekhā thā abhī bāzār meñ dekhā

na tujh ko mast-e-havā-e-gulshan ḳhizāñ meñ ai andalīb dekhā
nahīñ tū shaidā.ī bāġh-o-gul kā magar fidā.ī hai rañg-o-bū kā

jo chāhte haiñ chaman ko bāTeñ vo kaise bāTeñge fasl-e-gulshan
bahegā ġhunchoñ kā ḳhuun kitnā unheñ to is kā bhī Dar nahīñ hai

gulshan-e-jag meñ zarā rang-e-mohabbat niiñ hai
bulbul-e-dil kuuñ kisī saath ab ulfat niiñ hai

agar gulshan taraf vo nau-ḳhat-e-rañgīñ-adā nikle
gul o raihāñ suuñ rañg-o-bū shitābī peshvā nikle

jo vā bhī ho qafas kā dar to ham us se na hoñ bāhar
nahīñ dil meñ hamāre valvale ab sair-e-gulshan ke

qismat-e-ahl-e-qafas phūloñ kī ḳhushbū bhī nahīñ
yuuñ to gulshan meñ sabā ne phuul mahkā.e bahut

ye ghar mirā gulshan hai gulshan kā ḳhudā hāfiz
allāh nigahbān nasheman kā ḳhudā hāfiz

gulshan gulshan sahrā sahrā kis ne phūñkā aisā fusūñ
ik ik taa.ir sañg huā hai tum bhī chup ho ham bhī chup

mat is adā o naaz se gulshan meñ kar guzar
Dartā huuñ maiñ mabādā kisī kī nazar lage

ye to sahrā kī havā.eñ haiñ gila kyā un kā
ḳhuub jhulsāyā hai gulshan kī sabā ne ham ko

bahār aa.egī gulshan meñ to dār-o-gīr bhī hogī
jahāñ ahl-e-junūñ hoñge vahāñ zanjīr bhī hogī