Tags-Gulshan

vo terī bazm se bāzār ho ki gulshan ho
kahāñ kahāñ na mirā dil tirā nishāna huā

dekho to rahā dasht-navardī pe jo nāzāñ
vo 'arsh' ravāñ jānib-e-gulshan to nahīñ hai

vahī gulshan hai lekin vaqt kī parvāz to dekho
koī taa.ir nahīñ pichhle baras ke āshiyānoñ meñ

kuchh na kuchh aaj asīroñ ne kahā to hai zarūr
ek ik gul se lipaTtī hai sabā gulshan meñ

ghuT ke rah saktī thī kab tak ātish-e-rañg-e-bahār
zarb-e-mausam bhī kuchh aisī thī ki sab gulshan jalā

jin meñ dahqānoñ kī hasrat kā jhalaktā hai lahū
ham ko vo gulshan-e-shādāb jalāne hoñge

ai kisī gulshan zarrīñ kī garāñ-qadr kalī
apnī ujḌī huī mahkār chhupā le mujh se

bāhar se to lagtā hai ki shādāb hai gulshan
andar se har ik peḌ kī hālat hī alag hai

kahīñ luT rahā hai ḳhirman kahīñ jal rahā hai gulshan
use kis ne sauñp dī hai ye chaman kī pāsbānī

gulshan-e-ālam kī nairañgī se hotā hai yaqīñ
phir shagūfa phūltā hai phir badaltī hai havā

fajar uTh ḳhvāb siiñ gulshan meñ jab tum ne malī añkhiyāñ
ga.iiñ muñd sharm suuñ nargis kī pyāre juuñ kalī añkhiyāñ

ġhair kī qabr hai gulshan hai na dāman un kā
mujh se dekhī nahīñ jaatī gul-e-tar kī sūrat

qaabū ḳhizāñ se zo.af kā gulshan maiñ ban gayā
dosh-e-havā pe rañg-e-gul-o-yāsaman gayā

ye soch ke tere qadmoñ kī kuchh ḳhaak uḌā dī gulshan meñ
har phuul meñ tere chehre kī thoḌī sī jhalak aa jā.egī

huuñ maiñ vo dil-soḳhta tāsīr-e-āh-e-garm se
gulshan-e-jannat meñ bhī daur-e-ḳhizāñ paidā karūñ

mujhe gulshan se ai josh-e-junūñ sahrā ko ab le chal
yahāñ is ke sivā kiyā hai ḳhizāñ aa.ī bahār aa.ī

vo andalīb-e-gulshan-e-ma.anī huuñ maiñ 'hafīz'
soz-e-suḳhan se aag lagā duuñ bahār meñ

murġh-e-dil daam meñ gesū ke ulajh kar na kahe
ho mubārak tumheñ gulshan to ye zindāñ mujh ko

sāvan jo chaḌhā phir bāġhoñ aur jhūloñ kī bāteñ hotī haiñ
gulshan kī rañgīñ sairoñ meñ kuchh rañgīñ dhāteñ hotī haiñ

rañgīñ gulshan rañgī sahrā rañgī duniyā rañgī bāteñ
nāche kheleñ dauḌeñ bhāgeñ rātoñ jāgeñ nīñdoñ māteñ