Tags-Gulshan

duur jab se sifat-e-barg-e-ḳhizāñ-dīda hai
yaad aatā hai shab-o-roz vo gulshan kaisā

thā kabhī daur-e-asīrān-e-qafas ai sayyād
ab to ik phuul kī muhtāj haiñ gulshan kaisā

uns hai ḳhāna-e-sayyād se gulshan kaisā
nāz-parvard-e-qafas huuñ maiñ nasheman kaisā

ye bajā har gul hai vaj.h-e-zīnat-e-gulshan magar
merī duniyā-e-nazar meñ ḳhaar hai tere baġhair

milegā zulf-e-āzādī unheñ kyā mausam-e-gul meñ
qafas se chhūT kar gulshan meñ jo be-bāl-o-par aa.e

aao to bahal jaa.e merā dil-e-dīvāna
gulshan hai bahārāñ hai labrez hai paimāna

taras rahe haiñ jo gulshan meñ āshiyānoñ ko
kal unhīñ murġh-e-chaman kā qafas se rishta thā

kumhlā na jaa.e gulshan-e-shām-o-sahar 'hazīñ'
muddat se chal rahī hai sulagtī huī havā

gulshan meñ un ko dekh ke mahv-e-ḳhirām-e-nāz
samjhī nigāh-e-shauq ki raqs-e-bahār hai

subh-gāhāñ dasht o gulshan meñ nasīm-e-narm-mauj
biich dariyā ke bhañvar huuñ aur jaulānī meñ huuñ

chaman-zār-e-tamannā kā faqat ik phuul murjhāyā
usī din se mire gulshan kī vīrānī nahīñ jaatī

mire lahū ko chhiḌak do tamām gulshan meñ
mirī vafāoñ pe uñglī uThā rahā hai koī

ḳhud ko minnat-kash-e-qismat na karo dīda-varo
gulshan-e-shauq ugānā hai tumheñ ātish meñ

vo āshiyāna ho gulshan ho yā qafas 'kashfī'
sitam zamāne meñ ham par kahāñ kahāñ na huā

merā mahbūb hai vo shaḳhs jo chāhe to 'na.īm'
sūkhī Daalī ko bhī gulshan meñ badal saktā hai

na maiñ zindānī-e-sahrā na asīr-e-gulshan
koī bandish ho use jī kā ziyāñ kahtā huuñ

sīñchā thā jis ko ḳhūn-e-tamannā se rāt-din
gulshan meñ us bahār ke haqdār ham nahīñ

fasl-e-gul se thā ābād sehn-e-chaman fasl-e-gul jo ga.ī raunaqeñ luT ga.iiñ
yuuñ ḳhamoshī se shām-e-ḳhizāñ aa.egī ahl-e-gulshan ko is kī ḳhabar bhī na thī

kaun us kī fazāoñ meñ aa kar taḳhrīb ke sho.ale phūñk gayā
āḳhir ye vahī to gulshan hai rahte the jahāñ ham mil-jul ke

gulshan meñ bahār aa.e ki ḳhizāñ murjhā.e kalī yā phuul khileñ
sayyād tujhe kyā matlab hai tū ashk gine jā bulbul ke