Tags-Gulshan

shabnam ke bhī qatre gulshan meñ bad-mast kiye dete haiñ mujhe
labrez mai-e-ishrat se huī ek ek pyālī phūloñ kī

haañ gulshan-e-talab kī inheñ bulbuleñ samajh
vīrāñ-kade meñ jism ke ye ḳhvāhishoñ ke buum

jab thā zamāna dīvānoñ kā ab farzāne aa.e haiñ
jab sahrā meñ lāla-o-gul the ab gulshan meñ ḳhaak nahīñ

gul pe ye shabnam nahīñ paanī chhiḌaktī hai bahār
hā.e-re kinne lagā.ī aa ke is gulshan ko aag

tum bāloñ ko khole hue gulshan meñ jo aa.e
har shāḳh-e-shajar zulf-e-namat-ḳham nazar aa.ī

koī jā kar ḳhizāñ se kah aa.e
phuul gulshan meñ phir nikharte haiñ

aatī hī rahī hai gulshan meñ ab ke bhī bahār aa.ī hai to kyā
hai yuuñ ki qafas ke goshoñ se elān-e-bahārāñ honā thā

jis kalī se sehn-e-gulshan thā sajā
us kā ras āvāra bhañvrā pī gayā

qafas se dekh ke gulshan Tapak paḌe aañsū
jahāñ nazar hai yahāñ kaash āshiyāñ hotā

bahār aa.ī hai gulshan meñ magar mahsūs hotā hai
nazāre sahme sahme haiñ fazā dil-gīr hai saaqī

raushan kahīñ bahār ke imkāñ hue to haiñ
gulshan meñ chaak chand garebāñ hue to haiñ

kyuuñ mahak uThtā na ḳhushbū se dimāġh-e-ālam
nighat-e-gulshan-e-isrār gurū-nānak the

firāqe-e-gul se jo nāla-kash hai qafas meñ bulbul shahīd-e-jalva
bahār-e-gulshan ḳhizāñ-numā hai junūñ-zada abr-e-bahmanī hai

shauq hai gar vaqār kā gulshan-e-rozgār meñ
phūloñ ke saath hī 'azīz' kāñToñ se bhī nibāh kar

kabhī gulzār dāġh-e-ishq se dil ham bhī rakhte hai
kabhī ik taaza gulshan ai anādil ham bhī rakhte the

mujh ko lagtā hai nasheman kī mire ḳhair nahīñ
jab kisī shāḳh pe gulshan meñ tabar lagtā hai

dekho vo jaatī hai rishvat se ḳharīdī huī car
sehn-e-gulshan meñ ho jaise guzarāñ mauj-e-bahār

ajab ik vaqt gulshan meñ ye paiġhām-e-bahār aayā
fazā hī sāzgār aa.ī na mausam sāzgār aayā

ye kaun sā aalam hai afsurda-mizājī kā
gulshan meñ bhī vīrānī mahfil meñ bhī tanhā.ī

pahle mirī vafā ko mo.attar kiyā gayā
phir gulshan-e-hayā se sajāyā gayā mujhe