Tags-Gulshan

is gulshan-e-jahān meñ bad-ahd haiñ sabhī
bulbul yahāñ na ahd kisī gul se bāñdhiye

sehn-e-gulshan meñ DhūñDhtī hai kabhī
shoḳh phūloñ meñ bāñkpan apnā

maazī o haal kī tafrīq vo qurbat ye firāq
pyaar gulshan se chalā aayā hai zindānoñ meñ

kahne ko mire dil ke sun ai gulshan-e-ḳhūbī
gar hai to tire ko hai ye firdaus ye murdas

barq kyuuñ be-qarār hai itnā
ab to gulshan meñ āshiyāñ bhī nahīñ

be-faiz guzar jaate haiñ gulshan se hamāre
mausam ke bhī ab qaul-o-qasam TuuT rahe haiñ

tamām gulshan-e-imkāñ nisār hai tujh par
magar vo phuul jo mahkār tak nahīñ pahuñche

ab bhī āzād fazāoñ kā na imkāñ niklā
bāb-e-gulshan jise samjhe dar-e-zindāñ niklā

rañg-o-bū gul ko diyā gulshan meñ
sair-e-bulbul ko gulistāñ baḳhshā

sabze kā farsh abr kā ḳhema guloñ kā itr
gulshan meñ ehtimām hai kyā kyā tire liye

be-qaid-o-rusūm aa.ī haiñ gulshan meñ bahāreñ
ab haath garebāñ kī taraf jā nahīñ sakte

ham ko chalnā hai jo gulshan meñ to is tarah chaleñ
jaise gulshan ke havā-ḳhvāh chalā karte haiñ

qafas meñ aah had iizā hai ham ko
na aatī kaash gulshan kī havā ḳhush

ḳhvāb-o-ḳhayāl-e-gul se kidhar jaa.e aadmī
ik gulshan-e-havā hai jidhar jaa.e aadmī

ḳhizāñ meñ barg-e-gul aur ḳhār-o-ḳhas nahiñ sehn-e-gulshan meñ
paḌe haiñ laḳht-e-dil aur TuuTe naale andalīboñ ke

likkhā hai dāstāñ meñ ki gulshan ujaḌte vaqt
gulchīñ be-shumār the maalī koī na thā

gulshan-e-dahr meñ rāhat bhī hai aur rañj bhī hai
detī hai sub.h-e-vatan shām-e-ġharībāñ kī ḳhabar

sayyād ke ghar se gulshan tak allāh kabhī pahuñchā.e mujhe
ummīd nahīñ maiñ ḳhush ho kar dekhūñ ḳhush-hālī phūloñ kī

hāroñ meñ guñdhe jakḌe bhī ga.e gulshan bhī chhuTā siina bhī chhiddā
pahuñche magar un kī gardan tak ye ḳhush-iqbālī phūloñ kī

har barg-e-shajar par ḳhush ho kar gulshan meñ nichhāvar karne ko
nik.hat kā ḳhazāna khol diyā himmat hai ye aalī phūloñ kī