Tags-Gulshan

vo apne haath meñ ik phuul bhī le kar nahīñ aayā
magar jaise koī gulshan mire andar mahaktā hai

gul to gulshan meñ hazāroñ nazar aa.e lekin
us ke chehre ko jo dekhā to safā aur hī hai

jo hotā gulshan-e-ḳhūbī to hotī shān-e-mahbūbī
vahī insāñ hai lekin shāḳh-e-sad-pāra na thā pahle

sair-e-gulshan ko agar jaate ho hamrāh-e-raqīb
baḳhsho mere ta.iiñ mujh ko na bulāo jaao

gulshan se anādil ko qafas meñ hai sivā chain
ārām jahāñ ho vo ġharīboñ kā vatan hai

saare gulshan ko de ga.e sonā
aur ḳhud ḳhaak ban ga.e patte

shāḳheñ bhī balā.eñ letī haiñ patte bhī nichhāvar hote haiñ
allāh re javānī gulshan kī uf uf re zamāna phūloñ kā

gulshan meñ kabhī ham sunte the vo kyā thā zamāna phūloñ kā
kaliyoñ se kahānī kaliyoñ kī phūloñ se fasāna phūloñ kā

roz ḳhushbū tirī laate haiñ sabā ke jhoñke
ahl-e-gulshan mirī vahshat ko havā dete haiñ

gulshan-e-husn se behtar koī gulzār nahīñ
sumbul is tarah kā pur-pech-o-shikan hai kis kā

gulshan meñ josh-e-gul to bagūla haiñ dasht meñ
ahl-e-junūñ jahāñ bhī rahe aan se rahe

ye mohabbat kā asar hai yā mirā dīvāna-pan
sehn-e-gulshan sā nazar aatā hai vīrāna mujhe

vo naḳhl-e-ḳhushk huuñ maiñ is gulshan-e-jahāñ meñ
phirtā hai bāġhbāñ bhī mujh par tabar sambhāle

anādil kī sadā kyā buum bhī hai jis jagah anqā
'qalaq' is gulshan-e-vīrāñ meñ apnā āshiyāna hai

ik nasheman maiñ ne chhoḌā ik nasheman chhuT gayā
saaz bas chheḌā hī thā maiñ ne ki gulshan chhuT gayā

vo chāhte the phaleñ phūleñ naunihāl-e-chaman
na.e shagūfoñ se ho pur-bahār ab gulshan

sarv sābit-qadam is vāste gulshan meñ rahā
nahīñ dekhā kabhī jalva tirī rānā.ī kā

har taraf ḳhaar ḳhaar hai gulshan
bāġhbāñ ḳhuub bāġhbānī hai

raftār-e-yār kā agar andāz bhuul jaa.e
gulshan meñ ḳhaak uḌātī nasīm-e-sahar phire

sar-e-ashjār tahrīr havā achchhī nahīñ lagtī
hameñ patjhaḌ meñ gulshan kī fazā achchhī nahīñ lagtī