Tags-Gulshan

chaman chaman meñ khile phuul le ke naam tirā
tasavvurāt ke gulshan mahakne lagte haiñ

kuchh zamīñ kī hai ye tāsīr ki chehre haiñ hasīñ
shahr gar shahr na hotā koī gulshan hotā

chaman meñ rakhte haiñ kāñTe bhī ik maqām ai dost
faqat guloñ se hī gulshan kī aabrū to nahīñ

ḳhāliq huuñ bahāroñ kā sar-e-gulshan-e-hastī
jo phuul khilātā hai vo ik mauja-e-ḳhūñ huuñ

maiñ bad-qismat vo gulshan huuñ ḳhizāñ jis kā muqaddar hai
bahār aatī hai darvāze se aa kar lauT jaatī hai

tire baġhair hai be-rañg raunaq-e-gulshan
ye aur baat ki khulte haiñ phuul gulshan meñ

sameT kar tirī yādoñ ke phuul dāman meñ
basā rahā huuñ bahāroñ ko dil ke gulshan meñ

dāḳhila merā hī mamnūa hai gulshan meñ 'zakī'
jab ki ḳhuuñ maiñ ne diyā baaġh kī zebā.ī meñ

insān nahīñ vo jo gunahgār nahīñ haiñ
vo kaun sā gulshan hai jahāñ ḳhaar nahīñ haiñ

kūcha hai tirā aur hai din-rāt kā chakkar
vahshī ko tire gulshan-o-sahrā se ġharaz kyā

gulshan meñ ḳhirāmāñ ho ab burqa uThāyā hai
sab gir gayā sarvistāñ gulzār kī baarī hai

dil ke gulshan meñ tire pyaar kī ḳhushbū pā kar
rañg ruḳhsār pe phūloñ se khilā karte haiñ

gulshan-e-ālam kī nairañgī se hotā hai yaqīñ
phir shagūfa phūltā hai phir badaltī hai havā

aa.ī nahīñ kyā qaid hai gulshan meñ sabā bhī
aane lagī zanjīr kī kānoñ meñ sadā bhī

kaliyoñ kī mahak hotā tāroñ kī ziyā hotā
maiñ bhī tire gulshan meñ phūloñ kā ḳhudā hotā

ahbāb ko aise gulshan meñ fitne baune se kyā hāsil
jab do dil mohkam ho jaa.eñ jab va.ade paiham ho jaa.eñ

sab uḌe le ke phuul gulshan se
aur ham apnā āshiyāñ le kar

jab dil thā shagufta gul kī tarah Tahnī kāñTā sī chubhtī thī
ab ek fasurda dil le kar gulshan kī tamannā kaun kare

is gulshan-e-hayāt meñ rañg-e-ḳhizāñ ke saath
ik mausam-e-bahār bhī paidā kiyā gayā

ban-bāsiyoñ meñ jalva-e-gulshan le kar
tārīkiyoñ meñ shola-e-aiman le kar