Tags-Gulshan

havā-e-fasl-e-gul ke saath barq-e-'sho.ala'-bār aa.ī
nasheman meñ lagī hai aag gulshan meñ bahār aa.ī

fazā-e-sahn-e-gulshan bhī na thī ḳhālī kudūrat se
nasīm-e-sub.h bhī ālūda-e-gard-o-ġhubār aa.ī

guloñ par aisī ġhaflat thī na chauñke sahn-e-gulshan meñ
jagāne ke liye fariyād-e-bulbul go hazār aa.ī

khilā ġhuncha na dil kā garche gulshan meñ bahār aa.ī
havā-e-mausam-e-gul bhī na us ko sāzgār aa.ī

gulshan-e-firdaus par kyā naaz hai rizvāñ tujhe
pūchh us ke dil se jo hai rutba-dān-e-lucknow

bikhrī huī thiiñ chār-sū phūloñ kī pattiyāñ
gulshan sañvar sañvar gayā bād-e-sadā ke ba.ad

gul DhūñD rahe haiñ na kalī DhūñD rahe haiñ
gulshan meñ bas ik shāḳh harī DhūñD rahe haiñ

pāmāli-e-gulshan kī ye tasvīr hai 'mohsin'
shādābi-e-gulshan kā ye naqsha nahīñ koī

ta.ālallāh faiz-e-bāġhbāñ 'bismil' ta.ālallāh
ḳhas-o-ḳhāshāk-e-gulshan gul-ba-dāmāñ hote jaate haiñ

jalte hue kohsār pe ik shoḳh gilahrī
muñh moḌ ke gulshan se ba-sad naaz khaḌī thī

ulajhte haiñ tire kūche meñ jo murġh-e-chaman ke pair
dam-e-parvāz gulshan se kisī kā dil bhī bhartā hai

zahr-ālūda fazā meñ jab kalī sone lagī
ashk-e-shabnam ne kahā gulshan meñ purvā.ī bhī hai

gulshan pe hai ḳhizāñ kā tasallut to ġham nahīñ
dil meñ fareb-e-husn-e-bahārāñ sajā ke lā

sabza-o-ḳhār-o-gul sabhī haiñ aziiz
saare gulshan ko pyaar kartā huuñ

sahn-e-gulshan hai bahāroñ ke lahū se rañgīñ
shāḳh-e-gul hai ki bas ik teġh-e-ravāñ hai ab ke

gulshan-parast huuñ mujhe gul hī nahīñ aziiz
kāñToñ se bhī nibāh kiye jā rahā huuñ maiñ

sayyād ne khul kar baat na kī jis din se qafas meñ aayā huuñ
mālūm nahīñ miTTī merī gulshan kī hai yā vīrāne kī

gulshan meñ khile gul to havā chal ga.ī aisī
sābit na kisī kā bhī garebāñ nazar aayā