Tags-Gulshan

dekh gulshan meñ ātishīñ ruḳhsār
daaġh ho jal gayā gul-e-lāla

qafas se chhuTne pe shaad the ham ki lazzat-e-zindagī milegī
ye kyā ḳhabar thī bahār-e-gulshan lahū meñ Duubī huī milegī

ḳhizāñ-dīda thā us se pahle merā gulshan-e-hastī
mirā bāġh-e-tamannā ho gayā gulzār chuTkī meñ

sub.h kā manzar hai lekin gul koī taaza nahīñ
rū-e-gulshan par kahīñ bhī os kā ġhāza nahīñ

kah de khiltī huī kaliyoñ se koī gulshan meñ
itnā halkā ho tabassum ki nazar tak Thahre

ye kaisā mausam-e-gul hai ye kaisā gulshan hai
ravish ravish meñ khile haiñ gulāb patthar ke

is gulshan-e-hastī kā har rañg nirālā hai
jab rone lagī shabnam phūloñ ko hañsī aa.ī

muddat huī ki dil kā vo gulshan ujaḌ gayā
shādāb jo tire nafas-e-mushkbū se thā

ye kaun aayā hai gulshan meñ tāzgī le kar
chaman meñ phuul bahāroñ se baat karte haiñ

āshiyāñ kyā banā.ūñ gulshan meñ
qābil-e-āshiyāñ nahīñ huuñ maiñ

gulshan-e-ishq meñ ġhuncha bhī kalī hotā hai
naam āshiq kā bhī ma.ashūq-alī hotā hai

ḳhizāñ ke ba.ad is ummīd par gulshan nahīñ chhoḌā
ye mumkin hai ki chal jaa.e havā-e-ḳhush-gavār ab bhī

ḳhizāñ kā jo gulshan se paḌ jaa.e paalā
to sehn-e-chaman meñ na gul ho na laala

yā jigar meñ ḳhuuñ kam thā yā abhī junūñ kam thā
dasht ke evaz kartā varna qasd-e-gulshan kaun

andāz-e-zamāna kahtā hai phir mauj-e-havā ruḳh badlegī
añgāroñ se gulshan phūTegā shabnam se sharāre nikleñge

shamīm-e-gulshan nasīm-e-sahrā shuā-e-ḳhurshīd mauj-e-dariyā
har ek garm-e-safar hai in meñ merā koī ham-safar nahīñ hai

aah jab dil se nikaltī hai asar rakhtī hai
gulshan-e-zīst jalāne ko sharar rakhtī hai

ho ga.e ambar-fashāñ donoñ-jahāñ mere liye
muskurāyā gulshan-e-kaun-o-makāñ mere liye

barbādī-e-gulshan kā jo sāmān banā thā
barbādī-e-gulshan pe pashemāñ bhī vahī hai