Tags-Gulshan

yuuñ bahār aa.ī hai imsāl ki gulshan meñ sabā
pūchhtī hai guzar is baar karūñ yā na karūñ

vo kaun se ḳhatre haiñ jo gulshan meñ nahīñ haiñ
ham maut ke muñh meñ haiñ nasheman meñ nahīñ haiñ

phuul jo hai apne gulshan kā sipar kā phuul hai
har shajar is baaġh meñ laatā hai phal talvār kā

tujh ko bedārī-e-gulshan kī qasam hai ki bahār
zehn-e-insāñ bhī kahīñ jaag rahā hai ki nahīñ

yaar ke darsan ke ḳhātir jaan aur tan bhuul jā
mukh munavvar dekh us kā rañg-e-gulshan bhuul jā

jo vo ik ḳhush-ḳhayālī thī to ye ik kam-nigāhī hai
na vo phūloñ kā gulshan thā na ye kāñToñ kā sahrā hai

na le jā duur gulshan se are sayyād bulbul ko
ki bīmār-e-mohabbat par sitam Dhāyā nahīñ jaatā

is kār-e-numāyāñ ke shāhid haiñ chaman vaale
gulshan meñ bahāroñ ko laa.e the hamīñ pahle

tere jalve kā magar rū thā sahr-e-gulshan meñ
nargis ik dīda-e-hairān tamāshā.ī thā

kaahe ko dasht meñ chubhne ke liye rah jaatā
phuul hotā kisī gulshan kā gul-e-tar hotā

roz gulshan meñ yahī pūchhtī phirtī hai sabā
tere phūloñ meñ mirā ġhuncha-e-lab bhī koī hai

chaman meñ rakhte haiñ kāñTe bhī ik maqām ai dost
faqat guloñ se hī gulshan kī aabrū to nahīñ

mujh ko ehsās hai ab ḳhāk-e-vatan ko hai zarūrat merī
gulshan-e-amn-o-mohabbat ko hai hājat merī

zulf ke kūche se ho gulshan meñ guzre hai sabā
aaj vaañ jā kar guloñ ko koī bū mat kījiyo

jān-e-gulshan jo hue vo gul-e-tar dekhe haiñ
ham ne mausam ke hasīñ rañg kidhar dekhe haiñ

gulshan-e-zīst pe Daalā hai ḳhizāñ ne Derā
kyā ḳhabar kis ke chaman kī haiñ bahāreñ qaidī

hudūd-e-sahn-e-gulshan se nikal kar
sabā galiyoñ meñ chalnā chāhtī hai

haif barbādī-e-gulshan apne hī hāthoñ huī
muft meñ bād-e-ḳhizāñ ke sar pe kyuuñ ilzām hai

kahīñ ugā ho vo gulshan ho yā ki sahrā ho
hamesha phuul kī ḳhushbū se vāsta rakhnā

maiñ ḳhush huuñ agar gulshan ke liye kuchh merā lahū kaam aa jaa.e
lekin mujh ko Dar hai is kā gulchīñ pe na ilzām aa jaa.e