Tags-Gunah

tere maz.hab meñ hifāzat aabrū kī hai gunāh
māñgtī hai terī bātoñ se nissā.iyat panāh

terā zāhir ḳhushnumā hai terā bātin hai siyāh
har adā terī mukammal dāvat-e-jurm-o-gunāh

luTtā hai ḳhāna-e-dil-e-āshiq bachā.iye
bigḌī huī hai fauj-e-mizha kis gunāh par

ye aarzū ke sitāre ye intizār ke phuul
chamak rahī haiñ ḳhatā.eñ mahak rahe haiñ gunāh

ye rasm barham fanā hai ai dil gunāh hai jumbish nazar bhī
rahegī kyā aabrū hamārī jo tū yahāñ be-qarār hogā

kuchh nahīñ mere be-shumār gunāh
vo agar barsar-e-hisāb nahīñ

aur koī gunāh yaad nahīñ
sajda-e-be-ḳhudī ke mujrim haiñ

mirī zindagī mirī shā.irī kisī ġham kī den hai 'jāfarī'
dil o jaañ kā qarz chukā diyā maiñ gunāhgār nahīñ gayā

yuuñ zindagī guzār rahā huuñ tire baġhair
jaise koī gunāh kiye jā rahā huuñ maiñ

māsūmi-e-jamāl ko bhī jin pe rashk hai
aise bhī kuchh gunāh kiye jā rahā huuñ maiñ

dil meñ kisī ke raah kiye jā rahā huuñ maiñ
kitnā hasīñ gunāh kiye jā rahā huuñ maiñ

daur kī āshiqī gunāh nahīñ
dekh lete haiñ dekh-bhāl kā kyā

gunāhgār haiñ mehrāb-e-teġh ke sājid
jhukāyā sar to adā farz-e-panj-gāna huā

rahzanoñ kā qasr-e-shūrā qātiloñ kī ḳhvāb-gāh
khilkhilāte haiñ jarā.em jagmagāte haiñ gunāh

ab kaheñ kis se ki un se baat karnā hai gunāh
jab kalām aayā zabāñ par lā-kalām aa hī gayā

sab ahl-e-hashr jab apne kiye ko pā.eñge
baḌā mazā ho jo mujh ko mirā gunāh mile

qarīb-e-mai-kada mujh ko jo ḳhānqāh mile
gale savāb ke kyā kyā mire gunāh mile

kyā jaane rahmatoñ ne liyā kis tarah hisāb
do chaar bhī gunāh na nikle shumār meñ

ifrāt-e-ma.asiyat se fazīlat milī mujhe
maiñ huuñ gunāhgāroñ kī pahlī qatār meñ

ye daur ahl-e-qalam pe bhārī ki maslahat kī sabīl jaarī
gunāh ko bhī savāb kahnā babūl ko bhī gulāb likhnā