Tags-Hausla

husn ko vus.ateñ jo diiñ ishq ko hausla diyā
jo na mile na miT sake vo mujhe mudda.ā diyā

jo hausla ho to halkī hai dopahar kī dhuup
tunak-mizājoñ ko lagtī hai yuuñ qamar kī dhuup

zabt bhī chāhiye zarf bhī chāhiye aur mohtāt pās-e-vafā chāhiye
zindagī dushmanoñ meñ bhī mushkil nahīñ aadmī meñ zarā hausla chāhiye

ruk jā hujūm-e-gul ki abhī hausla nahīñ
dil se ḳhayāl-e-tañgī-e-dāmāñ gayā nahīñ

muqābil ā.eñge har baar taaza hausla le kar
tujhe ham āzmā.ish meñ sitam-ījād rakkheñge

ḳhatm ho jaa.e dukhoñ kā ye pahāḌī silsila
aur qaa.em do diloñ kā hausla yūñhī rahe

sadāqatoñ kī hifāzat kā hausla ho agar
to apne hāthoñ se neze pe apnā sar rakkho

chup chaap be-zabāñ koī merī anā meñ thā
varna kahāñ ye hausla merī binā meñ thā

vaqt ḳhush-ḳhush kāTne kā mashvara dete hue
ro paḌā vo aap mujh ko hausla dete hue

tamām umr azāboñ kā silsila to rahā
ye kam nahīñ hameñ jiine kā hausla to rahā

tumhāre ba.ad ḳhudā jaane kyā huā dil ko
kisī se rabt baḌhāne kā hausla na huā

kab lazzatoñ ne zehan kā pīchhā nahīñ kiyā
ye merā hausla thā ki lab vā nahīñ kiyā

shikasta-dil ko zarūrat hai khilkhilāne kī
payām-e-gul se tujhe hausla milā ki nahīñ

mujh pe ab mohabbat meñ zahr piinā vājib hai
maiñ ne dil nahīñ haarā hausla bhī haarā hai

ḳhvāboñ ne har qadam pe mujhe hausla diyā
dekhī nahīñ hai tum ne kyā tāsīr ḳhvāb kī

vo taġhāful bhī na thā aur tavajjoh bhī na thī
kabhī Tokā na kabhī hausla-afzā.ī kī

mere ġhurbat ke dinoñ meñ hausla de jā.egā
dost mere tū ḳhushī kī ik sadā de jā.egā

zindagī ko hausla dene ke ḳhātir
ḳhvāhishoñ ko reza reza chun rahā huuñ