Tags-Hawa

mīr-e-mahfil na hue garmī-e-mahfil to hue
sham.a-e-tābāñ na sahī jaltā huā dil to hue

tū nasīm-e-sahar mausam-e-gul
maiñ ki ik TuuTā huā pattā thā

reza reza huā qasr-e-pindār
be-tarah zor-e-badan TuuTā thā

ġham-e-mohabbat hai us kā jis ko nahīñ vo ġham ain hai vo rāhat
ḳharāb jo ishq meñ hai us ke nahīñ vo bigḌā banā huā hai

jo hai talabgār us kā sādiq huā hai donoñ-jahāñ se fāriġh
na hūr-o-ġhilmāñ kā hai vo ḳhvāhāñ na vo hasīnoñ pe shefta hai

ba.az auqāt to aisā bhī huā
chhin gayā ham se hamārā saaya

hisār-e-ġham se jo nikle bhī to kidhar aa.e
bahut malāl huā lauT ke jo ghar aa.e

pas-e-mauj-e-havā bārish kā bistar sā bichhāne
sar-e-bām-e-navā bādal kā TukḌā ho rahā hai

tujhe bhī ishq huā hai ye kis zamāne meñ
nahīñ hai māl-e-mohabbat bhī dil-ḳhazāne meñ

ye tai huā hai ki sher o adab ke paimāne
hamāre shahr kā ik yak-fanā hī tai karegā

bahut hī tez havā sher-e-hādsāt kī thī
maiñ girte girte na jaane sambhal gayā kaise

kahīñ bhī aag lagāne kā vāqi.a na huā
to phir huzūr makāñ merā jal gayā kaise

vo bhī milte the kabhī mujh se 'nazar'
kabhī aisā bhī huā kartā thā

huā do gaz kafan mun.im ko hāsil māl-e-duniyā se
bañdhī rakkhī hī āḳhir rah ga.ī gaThrī doshāloñ kī

bujhī hai pyaas zamīñ kī to ye tapish kyuuñ hai
vo abr hai to barastā huā nazar aa.e

kahīñ sahar kā ujālā huā hai ham-nafaso
ki mauj-e-barq sar-e-shāḳh-sār guzrī hai

ye hādisa bhī huā hai ki ishq-e-yār kī yaad
dayār-e-qalb se begāna-vār guzrī hai

chhuptā nahīñ chhapāne se aalam ubhār kā
āñchal kī tah se dekh numūdār kyā huā

yaaro vo sharm se jo na bolā to kyā huā
āñkhoñ meñ sau tarah kī hikāyāt ho ga.ī

tere qadmoñ kī aahaT ko tarsā huuñ
maiñ bhī terā bhūlā huā ik rastā huuñ