Tags-Hijr

tumhāre hijr kī rātoñ meñ jab tanhā.ī Dastī hai
bajā kar apnī ham sāñsoñ kī sargam raqs karte haiñ

hijr karte yā koī vasl guzārā karte
ham bahar-hāl basar ḳhvāb tumhārā karte

vo duur thā to hijr kī garmī se the niDhāl
vo aa gayā to hijr kā mausam nikal gayā

kyā hī rah rah ke tabī.at mirī ghabrātī hai
maut aatī hai shab-e-hijr na niiñd aatī hai

hijr meñ us but-e-kāfir ke taḌapte haiñ paḌe
ahl-e-zunnār kahīñ sāhib-e-islām kahīñ

vasl ho vasl ilāhī ki mujhe taab nahīñ
duur huuñ duur mire hijr ke ayyām kahīñ

dafīna jaan in āñkhoñ ko hijr meñ us ke
jo in meñ ashk haiñ pinhāñ navādirāt samajh

vasl ke ba.ad hijr kā kyā kaam
duur gardūñ kā intizām nahīñ

siine ke zor se bhī mū bhar nahīñ ukastī
in rozoñ hijr kī sil ye bhārī ho ga.ī hai

aur to paas mire hijr meñ kyā rakkhā hai
ik tire dard ko pahlū meñ chhupā rakkhā hai

zaḳhm-hā-e-hijr meñ kyā kyā sahe
kushtagān-e-teġh-e-faulādī haiñ ham

ajab kuchh zindagānī ho ga.ī thī hijr meñ apnī
na hañste the na rote the na jiite the na marte the

ham kahāñ aur tum kahāñ jānāñ
haiñ ka.ī hijr darmiyāñ jānāñ

nahīñ rahtā tafāvut jab visāl-o-hijr meñ kuchh bhī
ye manzil intizār-e-shauq meñ mushkil se aatī hai

chāñd tanhā hai kahkashāñ tanhā
hijr kī raat āsmāñ tanhā

tirī marzī par ham raazī haiñ jo tū chāhe so ham chāheñ
ham hijr kī fikr nahīñ karte ham zikr-e-visāl nahīñ karte

sadma-e-hijr meñ tū bhī hai barābar kā sharīk
ye alag baat tujhe tāb-e-shakebā.ī hai

hijr ke tapte mausam meñ bhī dil un se vābasta hai
ab tak yaad kā pattā pattā Daalī se paivasta hai

kartā huuñ roz-e-hijr maiñ tadbīreñ dosto
kyā kyā tasallī-e-dil-e-muztar ke vāste

vaqt kā kaTnā us se pūchho hijr meñ jis kī guzrī ho
ek ik lamha ek sadī thā kab ham par āsān huā