Tags-Hijr

tire hijr meñ zehn pighaltā thā tire qurb meñ āñkheñ jaltī haiñ
tujhe khonā ek qayāmat thā tirā milnā aur azaab huā

jab hijr ke shahr meñ dhuup utrī maiñ jaag paḌā to ḳhvāb huā
mirī soch ḳhizāñ kī shāḳh banī tirā chehra aur gulāb huā

maj.hūl hai mat.ūn hai mal.ūn hai vo shaḳhs
jo hijr se ghabrā ke ho mafrūr minal-ishq

kahāñ tirī shab-e-gesū kahāñ mirī shab-e-hijr
muqābla bhī nasīb-e-siyāh karne de

hijrat se pahle hijr ke the vasvase mujhe
har lamha hādisa thā guzarne se peshtar

ḳhayāl-e-vasl meñ rahte haiñ raat bhar bedār
tumhāre hijr ke māroñ ko niiñd kyā aa.e

paanī kī tarah phail ga.ī ghar meñ shām-e-hijr
tā-sub.h Duub Duub ke ubhrā kare koī

hijr ne kaun sā paivand lagā rakkhā thā
rāsta mil gayā ḳhanjar ko guzar jaane kā

dam-e-āḳhir kī mulāqāt meñ kyā tum se kahūñ
vaqt hī tañg bahut hijr ke afsāne kā

kushāda barg raheñ hijr ke ghane saa.e
tire visāl ke sahrā meñ jal rahā huuñ abhī

mat dekh ki phirtā huuñ tire hijr meñ zinda
ye pūchh ki jiine meñ maza hai ki nahīñ hai

jab bhī hotī hai dar-e-ḳhvāb pe dastak koī
jaag jaatā hai tire hijr kā maarā huā ishq

'ahmad' use batātā rahā hijr maut hai
maanā nahīñ to mar ke dikhānā paḌā use

kisī ke hijr se aage baḌhī na umr mirī
vo raat biit ga.ī 'naqsh' ratjagā na gayā

kāñTā sā khaTaktā hai kaleje meñ ġham-e-hijr
ye ḳhaar nahīñ dil se gul-andām nikaltā

na hijr hai na vasl hai ab is ko koī kyā kahe
ki phuul shāḳh par to hai magar khilā nahīñ rahā

maiñ ek hijr-e-be-murād jheltā huuñ raat din
jo aise sabr kī tarah hai jis kā phal nahīñ rahā

hameñ to hijr meñ hī kāTnī hai zindagī ab to
vo aa jaa.e nahīñ ummīd baaqī ab zarā sī bhī

ab tire hijr se mānūs tabī.at hai mirī
pahle vaalī sī nahīñ jaañ pe girānī hotī

ab mire paas nahīñ koī bhī rone kā javāz
hijr mausam kī sahī ashk fishānī hotī