Tags-Hijr

ajab hai tū ki tujhe hijr bhī garāñ guzrā
aur ek ham ki tirā vasl bhī gavāra kiyā

bār-e-ḳhātir huī ye umr-e-gurezāñ jānāñ
tujh ko samjhā thā ġham-e-hijr kā darmāñ jānāñ

ishq tire haath se tū hī batā kyā kareñ
vasl meñ hairāñ kiyā hijr meñ giryāñ kiyā

lo aa ga.ī huuñ hijr meñ marne ke vāste
itne ḳhulūs se jo pukārī ga.ī huuñ maiñ

hijr meñ muskurā.e jā dil meñ use talāsh kar
nāz-e-sitam uThā.e jā rāz-e-sitam na faash kar

yuuñ guzarte haiñ hijr ke lamhe
jaise vo baat karte jaate haiñ

ik chāñd hai āvāra-o-betāb o falak-tāb
ik chāñd hai āsūdgī-e-hijr kā maarā

kabhī to yaad kar iḳhlās fātiha kahnā
ki 'ābrū' kā huā hijr siiñ maran tujh bin

faisla hijr kā manzūr bhī ho saktā hai
aadmī ishq meñ majbūr bhī ho saktā hai

sulagte dasht kā manzar huī haiñ
ye āñkheñ hijr meñ banjar huī haiñ

vasl kī bar na aa.e aas kar ke hazār iltimās
hijr meñ ho jo mahv-e-yās vo ye ġhazal paḌhā kare

kyā ajab vasl kī ḳhvāhish na rahe
hijr kī raat basar hone tak

duur rah kar vatan kī fazā se jab bhī ahbāb kī yaad aa.ī
hijr meñ rah gayā dil taḌap kar aañkh fart-e-alam se bhar aa.ī

phir vahī maiñ huuñ, vahī hijr kā dariyā-e-amīq
koī dam aks-e-sar-e-āb meñ aayā huā huuñ

hijr jaañ kā ziyāñ vasl marg-e-junūñ
jiite rahne kā imkān yuuñ hai na yuuñ

tumhāre hijr kī sadiyāñ tumhāre vasl ke din
maiñ is shumār se niklūñ to aur kuchh sochūñ

na kuchh samajh meñ jo aa.e dil kī to ro paḌūñ maiñ
ki hijr meñ ye guzarte lamhe azaab likkhūñ

hijr ke kaale samundar kā nahīñ sāhil koī
mauja-e-tūfān-e-dahshat se varā kuchh bhī nahīñ

hijr kī raat itnī lambī hai
jaise hogī na ab sahar shāyad

vasl meñ bhī hijr ko mahsūs kar ke aa ga.e ham
dil lagāne ko ga.e the aañkh bhar ke aa ga.e ham