Tags-Hijr

ai hijr-zād tum ko bhī hai ārzū-e-vasl
ai dasht-zād tum ne bhī kashtī ḳharīd lī

ġhair shāista-e-ādāb-e-mohabbat na sahī
ham tire hijr ke āzār meñ mar kab ga.e haiñ

vo ik lamha jo tere vasl kā thā
bayāz-e-hijr par likkhā huā hai

na pūchh hijr meñ jo haal ab hamārā hai
umīd-e-vasl hī par in dinoñ guzārā hai

pahra lagā hī rah gayā ulfat meñ hijr kā
āñchal meñ yād-e-yār chhupā le ga.ī mujhe

hijr kī shab koī va.ada na koī yaad 'zafar'
tū ne kyā chiiz bachā kar mire shā.er rakkhī

aur kuchh der yūñhī mujh ko taḌapne dete
aap ne chhīn lī kyuuñ hijr kī lazzat merī

ye lamha lamha jo ham jām-e-hijr pī rahe haiñ
to tishnagī kā salīqa dharā na rah jaa.e

havā-e-vahshat-e-dil tez chal rahī hai bahut
ridā-e-hijr mirā sar khulā na rah jaa.e

'munīr' achchhā nahīñ lagtā ye terā
kisī ke hijr meñ bīmār honā

hijr kī rāhoñ se 'akbar' manzil-e-dīdār tak
yuuñ hai jaise darmiyāñ ik raushnī kā saal hai

ai parī-zād tire hijr meñ ye ham pe khulā
maut se ziyāda alam-baḳhsh hai tanhā honā

samajh meñ aane lagā maqsad-e-hayāt-o-mamāt
vo zāviye tire hijr o visāl ke dekhe

sabr kar hijr meñ tuuñ ai 'dā.ūd'
dekhnā hai agar sirījan kā

go añdherī hai 'mus.hafī' shab-e-hijr
par huī ḳhvāhish-e-charāġh kise

hijr kī shab hai aur ujālā hai
kyā tasavvur bhī luTne vaalā hai

ik kaarī zaḳhm kī chāhat ne kyā kyā na hameñ gulzār kiyā
ham kis kis se mansūb hue ik hijr baham karne ke liye

us kī dard āñkhoñ meñ
hijr kī kahānī hai

ye us ke qurb kī pādāsh meñ 'suḳhan' ham ko
nasīb hijr huā hai azaab kī sūrat

dil dhaḌaktā hai har ik aahaT pe ahl-e-hijr kā
jānte haiñ vo ki aa.egā koī is dam kahāñ