Tags-Hijr

taḌpūñgā hijr-e-yār meñ hai raat chaudhvīñ
tan chāndnī meñ hogā muqābil katāñ se aaj

chheḌtā hai dil ko kyā ai dard-e-hijr
ḳhud giraftār-e-hazār-āfāt hai

kyā tujh par bhī bechainī sī taarī hai
mujh par to ye hijr bahut hī bhārī hai

ḳhalish-e-hijr-e-dā.imī na ga.ī
tere ruḳh se ye be-ruḳhī na ga.ī

ek malāl kī gard sameTe maiñ ne ḳhud ko paar kiyā
kaise kaise vasl guzāre hijr kā zaḳhm chhupāne meñ

hijr kī shab hai hujūm-e-sad-balā
maiñ huuñ tanhā aur ḳhudā kī zaat hai

azāb-e-hijr bhī hai rāhat-e-visāl ke saath
milī to haiñ mujhe ḳhushiyāñ magar malāl ke saath

kabhī ḳhauf thā tire hijr kā kabhī aarzū ke zavāl kā
rahā hijr-o-vasl ke darmiyāñ tujhe kho sakā na maiñ pā sakā

ek zarā sā dard milā aur kāġhaz kaale kar Daale
ek zarā se hijr pe ik hañgāma machā ke rakhtā huuñ

na us kā ant hai koī na isti.āra hai
ye dāstān hai hijr-o-visāl se bāhar

sūraj ke saath tū bhī lahū ro ke Duub jā
ai shām-e-hijr tere parastār so ga.e

sahl kar dī zindagī un kī umīd-e-dīd ne
varna un ke hijr meñ marnā koī mushkil na thā

thiiñ jo kal tak shab-guzārī kā vasīla hijr meñ
ab unhīñ yādoñ ko tum āzār hote dekhnā

ham kahāñ aur tum kahāñ jānāñ
haiñ ka.ī hijr darmiyāñ jānāñ

maañ se kyā kaheñgī dukh hijr kā ki ḳhud par bhī
itnī chhoTī umroñ kī bachchiyāñ nahīñ khultīñ

ḳhātma hijr kī shab kaun karegā merā
hasrat-e-vasl kā bigḌā huā anjām ki tū

sunā kartā huuñ ta.ane hijr meñ kyā kyā raqīboñ ke
banā huuñ is mohabbat meñ malāmat kā nishāna bhī

hai shab-e-hijr vādī-e-vahshat
dīda-e-ġhūl hai charāġh apnā

hijr meñ tar ho kyā dimāġh apnā
ḳhushk lab aap hai ayāġh apnā

hijr kī aag meñ azaab meñ na de
misl-e-sīmāb iztirāb na de