Tags-Hijr

hijr meñ muztarib sā ho ho ke
chār-sū dekhtā huuñ ro ro ke

kyuuñ tire hijr ke manzar pe sitam Dhāte haiñ
zaḳhm bhī dete haiñ aur ḳhvāb bhī dikhlāte haiñ

kār-e-firāq-o-hijr to ujlat kā kaam hī nahīñ
lamhe tire ḳhayāl ke tujh se bhī tez-gām haiñ

maut bhī aatī nahīñ hijr ke bīmāroñ ko
kyā musībat hai zarā dekhnā bechāroñ ko

'fānī' ummīd-e-marg ne bhī de diyā javāb
jiine kī hijr meñ koī sūrat nahīñ rahī

'nūh' tūfān-e-hijr-e-ulfat meñ
koh-e-jūdī kī DhūñDte haiñ aaḌ

kab talak is hijr meñ āḳhir ko ronā chāhiye
aañkh bhī ḳhuuñ ho ga.ī dāman bhī ab galne ko hai

ye saarā hijr kā mausam ye saarī ḳhāna-vīrānī
ise ai zindagī mere junūñ ke naam likh denā

yaad kī gudḌī ko maiñ ne ek din pahnā nahīñ
ek din ke hijr meñ saarī balā.eñ mar ga.iiñ

hijr meñ jaan nikaltī nahīñ kyā aafat hai
maar kar aaj ajal ko shab-e-furqat aa.ī

hijr-e-sāqī meñ dahan se mire uchchhū ho kar
jo piyūñ āb-e-baqā bhī vo nikal ghuuT paḌe

āzurdagān-e-hijr kī vahshat ajiib hai
nikle na ghar se aur na ābād ghar kiyā

hijr o visāl charāġh haiñ donoñ tanhā.ī ke tāqoñ meñ
akasr donoñ gul rahte haiñ aur jalā kartā huuñ maiñ

achchhā nahīñ lagtā thā tire hijr meñ jiinā
ham lauT ga.e the to bikharne ke liye the

hijr kī be-panāh rātoñ meñ
log shauq-e-visāl meñ gum haiñ

ik tire vasl ke liye maulā
hijr kaaTe haiñ an-gine maulā

hijr kahtā hai ḳhuun piinā hai
maas jabki use khilātā huuñ

āzmā.eñge ġham-e-hijr kā ik aur ilaaj
kar ke sahrā meñ kuchh ayyām basar ā.eñge

hamārī ġhazloñ kā 'tāsīr' aasrā le kar
tumhāre hijr ke maare kalām karne lage

kyuuñ hijr ke shikve kartā hai kyuuñ dard ke rone rotā hai
ab ishq kiyā to sabr bhī kar is meñ to yahī kuchh hotā hai