Tags-Hijr

jo tere hijr meñ gum ho ga.e the kuchh raste
nishān un ke batā.e tumhī ne maiñ na milā

ḳhud jāgte haiñ rakhte haiñ tāroñ ko bhī bedār
be-kār shab-e-hijr guzārā nahīñ karte

vo hijr thā ki añdherā sā chhā gayā dil meñ
vo yaad thī ki chamakne lage the jugnū se

kul yaum-e-hijr zard zamānoñ kā yaum hai
shab bhar na jaag muft meñ āñkheñ na laal kar

dil tarafdār-e-hijr thā hī nahīñ
ab huā bhī to be-dilī se huā

dekho shab-e-hijr kī darāzī dekho
āshob-e-alam kī jāñ-gudāzī dekho

ye shabān-e-hijr kaTtīñ ye dil-e-hazīñ bahaltā
jo sahar ke aa.ine meñ kahīñ rū-e-yār hotā

zulmat-e-shām-e-hijr se 'imrran'
tazkire ek mah-jabīñ ke haiñ

bīmār-e-hijr maut se uTh kar lipaT gayā
vaade pe aayā jab koī terā gumāñ rahā

na dikhā.iyo hijr kā dard-o-alam tujhe detā huuñ charḳh-e-ḳhudā kī qasam
mire yaar ko mujh se na kiijo judā tujhe sarvar-e-har-dūsrā kī qasam

kahāñ jaatā hai muñh ko chhupā.e hue tire hijr meñ jaate haiñ ham to mare
kabhī muḌ ke idhar ko bhī dekh to le tujhe hazrat-e-sher-e-ḳhudā kī qasam

mujhe bahr-e-ḳhudā kahīñ us se chhuḌā tire hijr kī shab hai ye kaalī balā
nahīñ jhuuT maiñ kahtā kuchh is meñ zarā mujhe terī hī zulf-e-dotā kī qasam

suḳhan se rañg gayā zindagī se ḳhvāb ga.e
ye zaḳhm hijr kā kyuuñ indimāl ham ne kiyā

mushā.ire kā 'amānat' hai kis ko hijr meñ hosh
kahāñ ke sher kahāñ kī ġhazal kidhar kī tarah

mujh ko shām-e-hijr kī ye jalva-ārā.ī bahut
mahkī mahkī yaad terī aur tanhā.ī bahut

hogā koī ham jaisā kahāñ hijr-gazīda
mātam bhī to tanhā.ī kā tanhā nahīñ karte

siikh jā.ūñgā tire ba.ad bhī jiinā lekin
mujh ko ai dost tire hijr se Dar aa.egā

ai mire dil ke sulagte hue daġho bhaḌko
hijr kī raat vo jaltā huā ghar dekheñge

kisī ke hijr meñ hairat-kade ābād dekhūñ
kisī ke vasl meñ barbād honā chāhtā huuñ

dekh aa kar ki tire hijr meñ bhī zinda haiñ
tujh se bichhḌe the to lagtā thā ki mar jā.eñge