Tags-Hijr

hijr kī shab mirī tanhā.ī pe dastak degī
terī ḳhush-bū mire kho.e hue ḳhvāboñ kī tarah

gaah qarīb-e-shah-rag gaah ba.īd-e-vahm-o-ḳhvāb
us kī rafāqatoñ meñ raat hijr bhī thā visāl bhī

abhī hijr dāman meñ utrā nahīñ hai
magar vasl kā bhī to charchā nahīñ hai

ye raat ahl-e-hijr ke ḳhvāboñ kī raat hai
qissa tamām karnā hai sonā nahīñ hai aaj

is hijr o visāl ke biich kahīñ ik lamhe ko jī chāhtā hai
bas abr-o-havā ke saath phiro aur jism o jaañ se guzar jaao

mirī nazar meñ vahī mohnī sī mūrat hai
ye raat hijr kī hai phir bhī ḳhūb-sūrat hai

vasl meñ jaan se jā.egā to mar jā.egā
hijr meñ jaan se jā.egā to chhā jā.egā

ḳhauf aatā hai apne saa.e se
hijr ke kis maqām par huuñ maiñ

koī zinda rahe duniyā meñ kyā aglī umīdoñ par
abhī to hijr kā ronā hai hogā vasl jab hogā

ye kaam hijr meñ bid.at shumār hotā hai
magar ye dekh ki ham phir bhī muskurāte haiñ

mujhe miTā ke rahegī ye raat hijr kī raat
azal se ye mirī dushman hai kyā kiyā jaa.e

phuuT kar bahne lage aañkh se naale shab-e-hijr
aur ham-sā.e use ne.amat-e-bārāñ samjhe

jab guzartī hai shab-e-hijr maiñ jī uThtā huuñ
ohda ḳhurshīd ne paayā hai masīhā.ī kā

vo ġhurfa-nashīnī hai na hai shahr-navardī
baaqī na rahā hijr meñ bistar ke sivā kuchh

ḳhvāhish-e-vasl! tirā kyā ho jo ham sāl-ba-sāl
ashra-e-soz ġham-e-hijr manāne lag jaa.eñ

ik aur ishq mujhe kah rahā thā aa 'ahmad'
ik aur hijr mirī ghaat meñ dikhā.ī diyā

ab qalb-e-muztarib meñ nahīñ tāb-e-dard-e-hijr
ab aa bhī jaao dard kā darmāñ liye hue

aao dekheñ ye hijr kā sahrā
aur kartā hai dar-ba-dar kab tak

dāġh-e-kam-hauslagī dil ko gavārā na huā
varna kuchh hijr meñ dushvār na thā mar jaanā

hijr ik vaqfa-e-bedār hai do nīñdoñ meñ
vasl ik ḳhvāb hai jis kī koī ta.abīr nahīñ