Tags-Hijr

charāġh-e-hijr se ubhrī hai ik dhueñ kī lakīr
so dard bujh gayā hai aur malāl rah gayā hai

ghaḌī ghaḌī hijr kī hai bahārī dikhā.e sūrat ḳhudā tumhārī
sunūñ vo bāteñ piyārī piyārī ajab adā se ajab bayāñ se

shab-e-hijr meñ yaad aanā kisī kā
satā.e hue ko satānā kisī kā

shab-e-hijr kī taḌap ne vo mazā diyā hai mujh ko
ki duā.eñ māñgtā huuñ ye taḌap ho jāvedānī

kyuuñ hijr ke shikve kartā hai kyuuñ dard ke rone rotā hai
ab ishq kiyā to sabr bhī kar is meñ to yahī kuchh hotā hai

saañs ruk jaa.e taḌapte hue yādoñ meñ kahīñ
hijr kā bojh kabhī dil pe yuuñ Dhoyā hī nahīñ

hijr kī shaam se zaḳhmoñ ke doshāle māñgūñ
maiñ siyāhī ke samundar se ujāle māñgūñ

jagā kar dil-e-zār ne hijr kī shab
sahar tak kahī hai kahānī tumhārī

Dasā hai hijr ne ham ko
hamāre saañs niile haiñ

jo baat hijr kī aatī to apne dāman se
vo aañsū poñchhtā jaatā thā aur maiñ rotā thā

Dhalte Dhalte bhī ġhazab Dhaa.e gayā hijr kā din
kisī kāfir kī junūñ-ḳhez javānī kī tarah

kaisā firāq kaisī judā.ī kahāñ kā hijr
vo jā.egā agar to ḳhayāloñ meñ aa.egā

zaḳhm ye vasl ke marham se bhī shāyad na bhare
hijr meñ aisī milī ab ke masāfat ham ko

na vo hijr meñ rahīñ talḳhiyāñ na vo lazzateñ haiñ visāl meñ
na guzar tirā mire ḳhvāb meñ na maiñ gum huuñ tere ḳhayāl meñ

ye bijlī hai ki ai abr-e-shab-e-hijr
hai dhajjī ek dāmān-e-sahar kī

hue ruḳhsat jahāñ se sub.h hote
kahānī hijr meñ yuuñ muḳhtasar kī

is safar meñ go tamāzat to bahut thī hijr kī
maiñ tirī yādoñ kī chhāñv sar pe le kar aa gayā

'munīr' aa rahī hai ghaḌī vasl kī
zamāne ga.e hijr kī raat ke

tum mujhe hijr kī rūdād sunā denā bas
maiñ tumheñ zaḳhm hasīñ ashk tilā.ī dūñgī

ho gayā aaj shab-e-hijr meñ ye qaul ġhalat
thā jo mash.hūr ki āġhāz ko anjām bhī hai